Por E.P. | SANTIAGO DE COMPOSTELA | 24/09/2022 | Actualizada ás 12:29
Galicia recibiu ata o momento uns 1.856 millóns de euros por parte do Estado no marco do Plan de Recuperación, Transformación e Resiliencia. De feito, hai máis de 2.900 beneficiarios entre empresas, particulares, administracións locais e outras entidades.
Son cifras que avanzou o delegado do Goberno en Galicia, José Miñones, e que evidencian, segundo asegura, que "o Plan de Recuperación está aquí, aínda que algúns se empeñen en trasladar o contrario". Trátase do último balance oficial de execución do plan do Executivo central, que "confirma o protagonismo que ten Galicia" neste proceso de transformación, xa que é a quinta autonomía con investimento, por detrás de Cataluña, Madrid, Comunidade Valenciana e Andalucía.
Ademais, Miñones subliña o "liderado e protagonismo" de Galicia nos Plans Estratéxicos (coñecidos como Pertes), xa que ata o momento participa en sete dos once que están en marcha --vehículo eléctrico, enerxías renovables, aeroespacial, innovación sanitaria, cadea agroalimentaria, economía circular e dixitalización do ciclo da auga--. De feito, ningún outro territorio do Estado participa en máis Perte que Galicia.
PIDE A RUEDA "QUE SE REMANGUE"
Dos 1.856 millóns recibidos, a Xunta xestionou directamente case o 60 por cento, uns 1.098 millóns. Por tanto, o delegado do Goberno subliña o "diálogo" e a "cogobernanza sen precedentes" que está a levar a cabo o Executivo estatal. Neste contexto, José Miñones pediu ao presidente da Xunta, Alfonso Rueda, que "deixe de pór en dúbida o que é unha realidade e que se remangue como o está facendo o Goberno para non perder nin un só euro desta oportunidade que é única para Galicia".
Mentres tanto, os 758 millóns restantes do plan foron xestionados polo Estado a través de mecanismos como subvencións, licitacións e os Perte, en ámbitos como transición verde, comercio e turismo, emprego, cultura, protección social, dixitalización e conectividade, educación, industria e peme, e ciencia e saúde.
Con máis de 110 convocatorias de axudas xa resoltas, o Goberno estima que o despregamento de investimentos beneficiou xa a máis de 2.900 participantes galegos. En concreto, 1.660 empresas, 920 entidades locais e outros organismos públicos, máis de 230 particulares e unhas 95 asociacións e fundacións.
"O Plan de Recuperación está aquí, en Galicia, aínda que algúns se empeñen en trasladar o contrario. Os galegos e as empresas galegas xa se benefician del e os fondos están a chegar a cada casa, a cada concello e ás empresas galegas", insistiu o delegado.
PROXECTOS E FONDOS DO MECANISMO 'REACT-EU'
Dentro do mecanismo de resiliencia, Miñones destaca que o Executivo central asignou a Galicia "en exclusiva" un proxecto piloto --exportable a outras comunidades-- de inclusión para perceptores do Ingreso Mínimo Vital (IMV) cun investimento que xa alcanza os 10,6 millóns de euros e que foi presentada polo ministro de Inclusión, Seguridade Social e Migracións, José Luís Escrivá, nunha visita realizada a Santiago.
Así mesmo, Galicia participa en catro plans complementarios para colaborar no ámbito do I+D+i: o de ciencias mariñas (6,6 millóns), o de ciencia-comunicación cuántica (6,2 millóns), o de ciencia-biodiversidade (12,3 millóns) e o de biotecnoloxía aplicada á saúde (2 millóns).
Máis aló dos 1.856 millóns do Plan de Recuperación, o Goberno asignou a Galicia 441 millóns de euros correspondentes ao fondo 'REACT-EU', para axudar aos territorios a fortalecer o Estado do benestar, blindar os servizos públicos e reactivar a economía tras o impacto da pandemia da covid.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.