Por Europa Press / Redacción | SANTIAGO DE COMPOSTELA | 24/09/2022 | Actualizada ás 18:21
A secretaria xeral do PPdeG, Paula Prado, defendeu a bonificación do 50% do imposto de patrimonio anunciada este venres polo presidente da Xunta, Alfonso Rueda, e criticou que a oposición estea "instalada en non estar á beira da xente".
En declaracións aos medios na I Festa Popular organizada polo PP de Santiago, Prado afirmou que os populares cren que "este é un momento de baixar impostos", algo que, asegurou, levan facendo "desde o ano 2009 co presidente Feijóo" e continúan "na mesma senda".
"Impostos cero no rural, baixar o imposto da renda ás persoas máis vulnerables e esta baixada de impostos doutro 25%, a maiores do outro 25% que había do imposto de patrimonio, súmase a todas as medidas que van incluídas nos orzamentos", reivindicou Paula Prado.
Sobre estas medidas, a secretaria xeral dos populares galegos incidiu en que estarán dirixidas "ás persoas máis vulnerables", polo que, engadiu, a Xunta goberna "para todo o mundo". Ademais, reflexionou que "o de subir impostos é cousa de esquerdas", mentres que "baixar impostos é cousa do Partido Popular". "Nesa liña imos seguir traballando", reiterou a popular.
APOIO A VEREA
Paula Prado apoiou este sábado o proxecto de Borja Verea como candidato do PP á alcaldía de Santiago de Compostela fronte á "inacción" do actual rexedor, Xosé Sánchez Bugallo. "Verea e o seu equipo teñen un proxecto para ter a cidade moderna e do século XXI que merece Santiago", reafirmou.
Prado afirmou que espera que nos próximos comicios municipais, previstos para o 28 de maio de 2023, a cidadanía vexa un proxecto "que pensa nun centro histórico habitable, nas posibilidades para acceder a unha vivenda, no comercio de proximidade e nas familias".
Nesta mesma liña, o candidato dos populares á alcaldía de Santiago, destacou que o PP representa "a experiencia". "Queremos cambiar a desgana e a falta de iniciativa por ganas de gañar e por novas enerxías para transformar e modernizar Santiago", proclamou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.