UGT-Galicia anuncia mobilizacións para manter o poder adquisitivo e campañas a favor da negociación colectiva
Sobre os orzamentos da Xunta para 2023, subliña que "teñen que darlle prioridade ao emprego, industria, reforzar os servizos públicos e apoio ás familias".
Por Europa Press / Redacción | SANTIAGO DE COMPOSTELA | 28/09/2022 | Actualizada ás 18:54
O segundo comité nacional de UGT-Galicia, que se reuniu este mércores en Santiago, anuncia mobilizacións polo mantemento do poder adquisitivo e campañas nos centros de traballo ante "o bloqueo" da patronal á negociación colectiva.
En concreto, o día 7, coincidindo co día mundial polo traballo decente, realizaranse concentracións; do 14 ao 28 de outubro desenvolverase unha campaña nos centros de traballo, en especial naqueles que teñen bloqueada a negociación colectiva e o 3 de novembro haberá unha gran mobilización en Madrid baixo a lema 'Salario ou conflito'.
Ademais, o comité aprobou dúas resolucións de urxencia, unha de apoio ás reivindicacións das traballadoras do servizo de axuda a domicilio que demandan un convenio "digno" e outra de apoio aos traballadores do mar e contra o regulamento comunitario que ameaza o emprego na pesca de arte de fondo en 87 áreas.
En canto aos orzamentos da Xunta para 2023, subliña que "teñen que darlle prioridade ao emprego, industria, reforzar os servizos públicos e apoio ás familias".
Este comité confórmano case 100 membros e é o máximo órgano dedirección do sindicato entre congresos. Forman parte do mesmo a comisión executiva de UGT-Galicia, cadros e delegados do sindicato en representación das federacións e das unións comarcais.
