Por E.P. | SANTIAGO DE COMPOSTELA | 28/09/2022 | Actualizada ás 20:46
Unhas 1.300 familias de Galicia pediron á Xunta no primeiro semestre de 2022 o certificado de monoparentais, para así poder beneficiarse desta "especial consideración" que obteñen de forma similar ás numerosas e as que teñen persoas dependentes ao seu cargo, por exemplo en materia fiscal e de axudas.
Esta cifra supón que xa case superar as dos dous anos anteriores, xa que en 2020 emitíronse 558 certificados e en 2021 case 1.500, de acordo con datos expostos este mércores no pleno do Parlamento galego pola conselleira de Promoción do Emprego e Igualdade, María Jesús Lorenzana, ao responder a unha pregunta oral da viceportavoz do BNG, Olalla Rodil.
A deputada nacionalista reclamou na Cámara que o Goberno autonómico faga "un rexistro" de familias monoparentais como xa prometeu "hai doce anos". E é que, tal e como sinalou, estas familias requiren medidas específicas porque "máis que duplican" a taxa de pobreza e exclusión social.
Respecto diso, a conselleira de Igualdade garantiu que "a totalidade" das familias, "sexan da tipoloxía que sexan", teñen "a absoluta protección da Xunta". Non en balde, lembrou que a lei galega de impulso demográfico aprobada en 2021 contempla non só ese rexistro, senón tamén unha ampliación do propio "concepto" de familias monoparentais.
Así mesmo, Lorenzana garantiu a futura aprobación dun regulamento para elas, pero condicionouno á aprobación da lei de diversidade familiar anunciada polo Ministerio de Dereitos Sociais e Axenda 2030, porque a normativa galega "terá que ir acorde" coa estatal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.