O TSXG absolve a un home acusado de exhibicionismo por andar espido no seu domicilio

A Sala do Penal do Tribunal Superior de Xustiza de Galicia (TSXG) ditou unha resolución na que estima o recurso presentado por un home condenado por un delito de exhibicionismo e provocación sexual, e absólveo dese delito, ao considerar que non se probou o contexto sexual ou o ánimo libidinoso do procesado.

A Audiencia Provincial de Pontevedra condenouno a un ano de cárcere por pasear espido de cintura para abaixo diante das fillas da súa parella, con quen convivía. O tribunal provincial, por outra banda, absolveuno dos delitos de agresión, de abuso sexual e de ameazas.

Na súa sentenza, o alto tribunal galego entende que non se probou ese ánimo libidinoso e que as propias fillastras do home, "que teoricamente serían as vítimas de semellante actitude, negan sentirse inquietadas por iso".

"O único acreditado é que o recorrente ten o costume de andar espido pola casa e, como máximo, ponse certas pezas como calcetíns e camiseta, pero deixando ao descuberto os seus xenitais", indicou o TSXG, que lembrou que o delito de exhibicionismo refírese a quen "executa ou fixera executar a outra persoa actos de exhibición obscena ante menores de idade ou persoas con discapacidade necesitadas de especial protección".

NON HAI EXHIBICIÓN OBSCENA

Respecto diso, indica que o Código Penal "non sanciona a simple mostra da propia nudez, senón o acto de exhibición obscena", á vez que apunta que "é constante" a xurisprudencia que desliga esta infracción "do concepto de pudor ou decencia". Por iso, advirten que o feito de andar espido polo propio domicilio "non debe ser cualificado, sen máis, como acto de exhibición obscena".

Para este tribunal, "unha cousa é andar espido pola casa adiante e outra moi distinta facer ostentación diso con expresa exhibición obscena dos propios xenitais", polo que incidiu en que se aceptan a conclusión da Audienca estaríase a prohibir "a nudez domiciliaria en casas onde hai fillos menores".

Do mesmo xeito, apunta que cabe a posibilidade de considerar que ao acusado "simplemente gustáballe andar espido pola casa, como naturista que era, e, se estaba a súa familia en casa, a cal nunca se opuxo á súa indumentaria, tampouco deixaba de facelo".

Os xuíces insisten en que "non se sostén a interpretación do tribunal de primeira instancia porque non hai na causa proba algunha da existencia de verdadeiros actos de exhibición obscena ante menores".

Acto de apertura do Ano Xudicial no Tribunal Superior de Xustiza de Galicia (TSXG). TSXG