O Sergas defende os 'vacinódromos' para maiores porque "optimizan" o "ben escaso" da enfermaría
Permitirá unha repesca nos centros de saúde.
Por Europa Press / Redacción | VIGO | 03/10/2022 | Actualizada ás 14:17
O conselleiro de Sanidade, Julio García Comesaña, informou de que o Servizo Galego de Saúde (Sergas) permitirá ás persoas maiores vacinarse de Covid-19 nos centros de saúde na repesca. Así o sinalou Comesaña ante os medios de comunicación antes de acudir ao acto de acreditación do Instituto de Investigación Sanitaria Galicia Sur, levado a cabo no Hotel Attica 21 Samil de Vigo.
Neste sentido, o titular de Sanidade explicou que nun primeiro momento a vacinación da cuarta dose de Covid se fará nos hospitais "para seguir tratando de preservar os centros de saúde", xa que co fin do verán espérase unha "recuperación importante" da actividade na Atención Primaria.
Segundo el, o funcionamento do modelo de puntos masivos de vacinación está "contrastado" coas anteriores doses de vacinas da Covid, xa que Galicia está entre as taxas máis altas de vacinados de España e de Europa. Tal como reivindicou, os 'vacinódromos' agrupan recursos e optimizan o uso da enfermaría que é un "ben escaso", o que permite un maior rendemento do persoal dispoñible.
A pesar diso, explicou que se algunha persoa non pode asistir, na repesca permitirase a vacinación nos centros de saúde e mesmo a domicilio para aquelas persoas que non poidan nin saír das súas casas, como xa ocorreu en ocasións anteriores. "Os centros masivos son unha oportunidade a maiores que non se tivo (para as persoas maiores) e que agora se ofrece. O Sergas vai facer todo o posible para que os galegos se vacinen", sentenciou.
