Os viaxeiros de media distancia en Galicia aumentaron de 226.000 a 453.000 nun ano

Renfe dispensou en Galicia case 51.000 abonos para trens de proximidade, Media Distancia (MD) e Avant desde a entrada en vigor da medida de gratuidade para viaxeiros recorrentes, o pasado 24 de agosto, segundo informou a compañía.

Así, Renfe confirmou que o número de viaxeiros de Media Distancia en setembro pasou en Galicia de máis de 226.000 (en 2021) a máis de 453.000, coa entrada en servizos dos abonos recorrentes. No caso dos trens Avant, os viaxeiros creceron desde 52.700 a máis de 105.000.

Renfe alcanzou este luns os 1,5 millóns de abonos gratuítos dispensados en toda España (para Proximidades, Rodalies e Media Distancia), dos que o 71,5 % correspóndese a abonos para viaxar nos distintos núcleos de proximidade, Rodalies e Proximidades Ancho Métrico, mentres que o 28,3% corresponde a abonos de Media Distancia. Os viaxeiros de Andalucía son os que máis abonos gratuítos MD retiraron, seguidos de Cataluña, Madrid e Galicia.

Segundo as estimacións realizadas, esta medida, tomada polo Goberno para paliar os efectos da crise provocada pola invasión de Rusia en Ucraína e potenciar o uso do transporte público, reducindo a dependencia enerxética e as emisións, beneficiará a máis de 75 millóns de desprazamentos.

Así mesmo, permitirá aforrar 118 millóns de litros de gasolina e evitar a emisión de 360.576 toneladas de CO2 á atmosfera, se o transporte se realizase en coche.