As obras da orbital de Santiago causarán cortes de tráfico na AP-9 a noite do martes ao mércores
Por E.P. | Santiago de Compostela | 03/10/2022 | Actualizada ás 17:32
O Ministerio de Transportes, Mobilidade e Axenda Urbana (Mitma) informou de cortes de tráfico na noite do martes ao mércores con motivo das obras da ligazón 'orbital' entre a AP-9 e a A-54 en Santiago de Compostela.
Así, "en aras de garantir a seguridade dos usuarios e os traballadores", o Ministerio confirmou que será necesario realizar o corte total simultáneo do tráfico en ambas as calzadas da AP-9 entre o km 55 (ligazón de Sigüeiro) e 67 (ligazón deSantiago Norte), entre as 22:00 horas do martes e as 06:00 horas do mércores 5 de outubro.
Con respecto ao tráfico en sentido A Coruña, terá que abandonar a vía pola saída inmediatamente anterior á zona de obra (saída 67, da ligazón de Santiago Norte) durante os traballos desa noite. Como itinerario alternativo exponse o traxecto pola SC-20 sentido Norte se o destino é a A-54 ou o aeroporto internacional de Santiago-Rosalía de Castro, e pola SC-20/N-550 con destino Sigüeiro (ligazón do quilómetro 55), con posibilidade de retomar alí novamente a AP-9 en sentido A Coruña.
Para a circulación en sentido Pontevedra, a totalidade do tráfico abandonará a autoestrada na ligazón inmediatamente anterior á zona de obra, na ligazón de Sigüeiro (saída 55) e, como itinerarios alternativos, proponse o traxecto pola N-550 en sentido Pontevedra, coa alternativa da ligazón co periférico SC-20 e posibilidade de tomar novamente alí a AP-9 en sentido Pontevedra, na ligazón de Santiago Norte (quilómetro 67).
Durante as afeccións proseguirán os traballos, xa iniciados o pasado mes de xullo, de transporte e colocación das vigas metálicas prefabricadas que conformarán a glorieta sobre a calzada da AP-9.
