Os internos de Teixeiro terán atención odontolóxica para "poder mellorar a súa saúde bucodental"
Durante a firma do convenio insistiuse en que a recuperación da saúde oral e o sorriso nestes pacientes, "é imprescindible para facilitar a reinserción e a adaptación ás novas condicións de vida"
Por Europa Press / Redacción | SANTIAGO DE COMPOSTELA | 05/10/2022 | Actualizada ás 15:56
Os internos do Centro Penal de Teixeiro continuarán recibindo atención odontolóxica --tratamentos bucodentais e protésicos-- para "poder mellorar a súa saúde bucodental", segundo recolle o novo convenio asinado polo presidente dos Odontólogos e Estomatólogos da Coruña, José María Suárez Quintanilla, e o director de Cáritas Diocesana de Santiago de Compostela, José Anuncio Mouriño.
Con esta actuación ofrecerase " asistencia e materiais de calidade similares aos ofrecidos na práctica privada para mellorar a saúde integral dun dos colectivos máis desfavorecidos da sociedade", dixo Anuncio Mouriño, mentres que Suárez Quintanilla lembrou que "cando as persoas entran ao cárcere, o estado da boca empeora moitísimo pola tensión, o cambio de hábitos, de dieta, ou o cepillado".
Durante a firma do convenio insistiuse en que a recuperación da saúde oral e o sorriso nestes pacientes, "é imprescindible para facilitar a reinserción e a adaptación ás novas condicións de vida e abre as portas a novas expectativas de traballo e reinserción laboral".
Na actualidade catro profesionais coordinados pola doutora Carmen Suárez, directora de programas do centro, encárganse da atención odontolóxica nunhas instalacións que foron remodeladas e que contan coa maior parte dos avances tecnolóxicos e diagnósticos.
Este programa atópase planificado de tal maneira que os internos, ao finalizar o seu período de rehabilitación, seguen sendo atendidos pola clínica social Assoeco, que o Colexio de Odontólogos ten instalada na Coruña, e cuxo obxectivo é o mantemento das condicións de saúde oral unha vez que os pacientes se integran de maneira definitiva na sociedade.
