A conselleira do Mar apela á unidade de rexións europeas para frear o veto á pesca de fondo
Isto, explicou, permitiría gañar tempo para presentar todos os informes técnicos e científicos necesarios "e dos que carece esta decisión unilateral da Comisión Europea, así como salvar unha campaña tan importante como é o Nadal para o sector pesqueiro".
Por Europa Press / Redacción | BRUSELAS | 06/10/2022 | Actualizada ás 18:17
A conselleira do Mar, Rosa Quintana, apelou á importancia da unidade entre rexións pesqueiras europeas para defender á frota ante o veto da Comisión Europea á pesca de fondo.
Nesta liña, incidiu na necesidade de que o Goberno central, como Estado membro, siga traballando na vía do recurso e pediu celeridade neste labor. Ademais, engadiu, Galicia considera fundamental insistir na suspensión temporal da medida e avanzar tamén nas xestións políticas co obxectivo de conseguir unha moratoria.
Isto, explicou, permitiría gañar tempo para presentar todos os informes técnicos e científicos necesarios "e dos que carece esta decisión unilateral da Comisión Europea, así como salvar unha campaña tan importante como é o Nadal para o sector pesqueiro".
Así o expuxo na reunión do grupo de traballo de pesca da Conferencia das Rexións Periféricas Marítimas (CRPM), onde estivo acompañada polo director xeral de Pesca, Acuicultura e Innovación Tecnolóxica, Antonio Basanta.
VETO EN MENOS ÁREAS
En relación ao anuncio do Goberno central de que Bruxelas deixará sen efecto o veto en 41 das 87 áreas, Rosa Quintana apelou á cautela pois o Executivo estatal, sostivo, aínda non trasladou oficialmente a Galicia esa suposta decisión.
Neste sentido, a Xunta considera que debe materializarse nalgún texto legal ou documento "pois o regulamento recolle claramente que a prohibición afecta ás 87 zonas recollidas no seu anexo".
Ademais ve primordial achegar seguridade xurídica ao sector e garantías ante a incerteza da frota en relación ás zonas nas que pode realizar a súa actividade e de que maneira. De confirmarse isto, subliñou Rosa Quintana, sería unha noticia relativamente positiva, "pero non a solución ao problema", xa que Galicia cuestiona "todo o regulamento".
REGULAMENTO
De novo, a titular de Mar fixo fincapé no "dubidoso sustento legal e científico" deste regulamento "no que faltan pasos e documentos crave como a análise de impacto socioeconómico e información rigorosa, xa que se asenta sobre datos desactualizados".
En canto ao incidente que podería ocasionar o veto -publicado no Diario Oficial da Unión Europea e que entrará en vigor o vindeiro domingo-, a titular de Mar lembrou que, en termos xerais, tería un impacto na economía galega de máis de 800 millóns de euros.
A maiores, explicou que pode chegar a afectar a máis de 4.400 tripulantes -ao redor do 40% do total na comunidade-, que repercute directamente na actividade de máis de 200 barcos de capital galego, e que pode afectar a outros 900 de maneira indirecta.
