En marcha un plan de axuda de máis de 10 millóns para 1.700 familias con menores en risco de pobreza
Entre as medidas que inclúe o proxecto, facilitaránselles actividades de reforzo escolar, axudas directas para o pago da renda ou de gastos médicos, cursos de economía doméstica e hábitos de vida saudable ou asesoramento para a inserción laboral.
Por Europa Press / Redacción | SANTIAGO DE COMPOSTELA | 06/10/2022 | Actualizada ás 18:55
O Goberno galego deu luz verde á firma de convenios con entidades para pór en marcha un proxecto pioneiro para loitar contra a pobreza infantil, que conta cun orzamento de 10,6 millóns de euros.
O programa ten como obxectivo principal, segundo remarca a Xunta, mellorar a situación das familias con menores que se atopen nunha situación de exclusión social ou en risco de padecela.
A través desta iniciativa, financiada con fondos do Plan de recuperación, transformación e resiliencia, axudarase a 1.700 familias galegas, cunhas 5.100 persoas que conforman estes fogares.
Entre as medidas que inclúe o proxecto, facilitaránselles actividades de reforzo escolar, axudas directas para o pago da renda ou de gastos médicos, cursos de economía doméstica e hábitos de vida saudable ou asesoramento para a inserción laboral.
As familias destinatarias serán, principalmente, receptoras do ingreso mínimo vital (IMV) ou da renda de inclusión social de Galicia (Risga), prestando especial atención ás monoparentais e ás numerosas.
A tal fin, asinaranse convenios con sete entidades especializadas neste ámbito para levar a cabo unha iniciativa que chegará a 32 municipios.
