Deteñen no Aeroporto da Coruña a dous cidadáns iranianos con pasaportes falsos
Por Europa Press / Redacción | SANTIAGO DE COMPOSTELA | 10/10/2022 | Actualizada ás 10:19
Axentes da Policía Nacional interceptaron e detiveron nos últimos días a dous cidadáns iranianos que pretendían viaxar desde o Aeroporto de Alvedro, na Coruña, ata o de Gatwick, en Reino Unido, con pasaportes falsos.
O primeiro dos episodios ocorreu o pasado 14 de setembro ás 9,30 horas. Axentes adscritos ao Posto Fronteirizo Aéreo da Brigada Provincial de Estranxeiría e Fronteiras da Coruña, cando desempeñaban funcións de control de pasaxeiros, detiveron a un primeiro nacional iraniano tras detectar que a súa documentación podía estar falsificada.
De feito, segundo informa a Policía Nacional, as comunicacións con oficiais da Embaixada Británica en España determinaron que o pasaporte que portaba correspondíase coa identidade dunha nacional británica.
Os investigadores determinaron que, ademais de tratarse dun documento falsificado, os selos de entrada e saída de diversos postos fronteirizos da Unión Europea que tiña estampados no pasaporte non eran auténticos, o cal foi certificado polo Centro Nacional de Coordinación de Postos Fronteirizos (Cefront).
A segunda detención produciuse o pasado mércores, 5 de outubro, cando a Policía Nacional volveu interceptar en Alvedro a un cidadán iraniano tras detectar que a súa documentación, neste caso un pasaporte de Dinamarca, podería ser falsa.
Os dous pasaxeiros detidos foron trasladados posteriormente a dependencias da Unidade Contra Redes de Inmigración Ilegal e Falsidades Documentais da Coruña, a fin de cumprimentar as dilixencias correspondentes. Ambos foron postos a disposición do Xulgado de Instrución de Garda.
