Por Europa Press / Redacción | A CORUÑA | 11/10/2022 | Actualizada ás 17:51
A Federación Galega de Estacións de Servizo (Fegaes) alertou da ameaza de peche sobre as pequenas gasolineiras do rural nun encontro co vicepresidente segundo da Xunta, Diego Calvo.
Segundo informa, os representantes de Fegaes, o seu presidente, Julio López e o vogal Jesús García, expuxeron ante o vicepresidente segundo "o difícil momento que atravesa o sector e a preocupación que supoñen os grandes cambios que se aveciñan".
Ambos os representantes incidiron en que é necesario prepararse para unha nova mobilidade en Galicia e, nese sentido, expuxeron a necesidade de informar os empresarios de estacións de servizo de toda a Comunidade (máis de 700) da análise, diagnóstico e propostas desenvolvidas pola Federación no plan estratéxico do sector.
Julio López fixo fincapé en que "son moitos os donos de estacións de servizo que non contan con instalacións dixitalizadas, pero, ademais, tampouco teñen a formación necesaria para levar a cabo un proceso de dixitalización, requirido na actualidade para, entre outras cousas, o cobro das bonificacións gobernamentais de 20 céntimos por litro de combustible".
O presidente de Fegaes informou o vicepresidente segundo dos novos peches de gasolineiras no rural e a urxencia que teñen estas estacións de servizo de contar con axudas para manter os seus negocios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.