Soben os casos activos e hospitalizacións nunha xornada cun novo falecemento
A área da Coruña é a que máis pacientes ten ingresados, con 49 en planta e dous en UCI.
Por Europa Press / Redacción | SANTIAGO DE COMPOSTELA | 12/10/2022 | Actualizada ás 11:24
As cifras da pandemia seguen empeorando, unha xornada máis, en Galicia, que xa supera os 200 positivos en 24 horas e aumenta tanto en casos activos como hospitalizados, á vez que suma un novo falecido. Segundo os datos publicados este mércores pola Consellería de Sanidade --con información ata as 18,00 horas do martes--, Galicia ten 1.757 casos activos de coronavirus, 66 máis que 24 horas antes, e detectou 210 positivos, 28 por encima da xornada anterior.
En canto ás persoas hospitalizadas, volven crecer. En concreto, Galicia suma cinco, catro en planta e un en UCI, o que deixa as cifras totais en 139 pacientes --136 en hospitalización convencional e tres en coidados intensivos--.
Por áreas sanitarias, a que máis pacientes ten ingresados segue sendo a da Coruña, con 49 en planta e dous en UCI. Ademais desta, soben as cifras de hospitalización na área de Vigo, con 18 pacientes en planta, e en Ferrol, con 11. A área de Santiago continúa con 13 pacientes en hospitalización convencional e ningún en coidados intensivos.
O resto de áreas, pola súa banda, experimentan unha diminución con respecto ás cifras do día anterior. Así, en Lugo hai 12 pacientes en planta, en Ourense hai 17 e en Pontevedra hai 16 en hospitalización convencional e un en coidados intensivos.
CASOS ACTIVOS E POSITIVOS
En canto aos casos activos, todas as áreas sanitarias experimentaron un incremento nas últimas 24 horas con excepción da de Vigo, onde diminuíron lixeiramente, ata os 225. A área que máis casos activos ten é, de novo, A Coruña, con 390, seguida de urense, con 317. En Santiago, pola súa banda, hai 279 casos e na área de Lugo 210. Por baixo dos 200 casos activos están en área sanitaria de Pontevedra, con 184, e a de Ferrol, con 152.
No caso dos novos positivos, repuntaron en Galicia ata os 210 nunha xornada. Deles, 53 foron na área da Coruña, 41 na de Santiago, 30 na de Lugo, 29 na de Ferrol, 23 na de Vigo, 22 na de Ourense e 12 na de Pontevedra. Desde o inicio da pandemia, resultaron contaxiadas en Galicia 679.668 persoas e superaron a enfermidade 674.095, mentres que faleceron con covid 3.925 persoas.
Por outra banda, realizáronse case catro millóns de probas de detección PCR, case dous millóns de probas de antíxenos, e 1,6 millóns doutro tipo de probas. Con respecto ás vacinas, fornecéronse algo máis de 6,7 millóns de doses.
