Arquivan a causa da Pokemon que investigou ao exalcalde do Carballiño Argimiro Marnotes
En concreto, a peza atribuía a Marnotes --alcalde entre 2011 e 2015-- un suposto delito de tráfico de influencias, outro de prevaricación administrativa e outro de suborno en relación a adxudicacións á empresa Vendex.
Por E.P. | SANTIAGO DE COMPOSTELA | 13/10/2022 | Actualizada ás 18:21
O xulgado do Carballiño deu carpetazo á peza separada da Operación Pokemon na que se investigaba ao exalcalde da localidade Argimiro Marnotes e a dous cargos de Vendex.
En concreto, a peza atribuía a Marnotes --alcalde entre 2011 e 2015-- un suposto delito de tráfico de influencias, outro de prevaricación administrativa e outro de suborno en relación a adxudicacións á empresa Vendex.
Con todo, a peza agora quedou arquivada por prescrición dos delitos, tal e como recolle o auto, xa que transcorreron máis de cinco anos desde a data en que ocorreron os feitos sen que se puxeron medios ou practicado novas dilixencias para indagar na veracidade dos cargos.
Con isto, péchase unha nova vía da macrooperación Pokémon, iniciada no ano 2012 pola xuíza Pilar de Lara e que chegou a ter máis dun centenar de imputados en distintos concellos e na contorna da empresa Vendex. Con todo, moitas das pezas separadas recibiron posteriormente carpetazo.
Entre as últimas, e finais do mes de setembro a Operación Pokémon sufría outros dous reveses. Primeiro, co arquivo da peza derivada a un xulgado de Santiago e na que permanecía investigado o exrexedor compostelán Gerardo Conde Roa, e, despois, co arquivo da peza que investigaba por tráfico de influencias ao exalcalde de Ourense Francisco Rodríguez.
