Rueda garante reforzar a cooperación en Arxentina para as empresas pesqueiras galegas

O presidente da Xunta, Alfonso Rueda, garantiu este xoves ás empresas pesqueiras galegas con presenza en Arxentina un reforzo na cooperación por parte do Goberno autonómico por tratarse dun sector estratéxico para Galicia.

"As empresas pesqueiras representan a Galicia aquí, xeran benestar en ambas as beiras do Atlántico, así que só cabe reiterar o firme apoio e a vontade de cooperación da Xunta de Galicia", así llo transmitiu Rueda aos directivos de grandes compañías pesqueiras galegas no país latinoamericano, entre as que se atopaban Arxenova, Iberconsa, Vieira Arxentina, Pescapuerta, Profand, Altamare e Pesqueira do Sur (Fandicosta), nunha reunión prioritaria dentro da súa primeira viaxe a América do Sur como titular do Goberno galego.

Precisamente, Rueda manifestou o interese de reunirse coas empresas pesqueiras galegas en Arxentina para coñecer de primeira man a súa situación no país e a as súas perspectivas, un encontro no que se puxeron encima da mesa cuestiones estratéxicas para o presente e o futuro da pesca galega.

O presidente da Xunta destacou que o sector pesqueiro, en concreto a cadea mar-industria en xeral, é un alicerce económico do máximo interese para Galicia e apuntou a súa importante achega en materia de emprego, exportacións e capacidade de dinamización sobre o territorio. Por este motivo, garantiulles o "pleno compromiso do Goberno autonómico para todo o que precisen".

Alfonso Rueda lembrou que, en Europa, estanse atravesado dificultades polo "veto inxustificado" da Comisión Europea á pesca de fondo en zonas de augas comunitarias, unha decisión contra a que a Xunta "loitará ata lograr que se corrixa nos tribunais".

Nesta liña, mostrou o compromiso do Goberno autonómico en velar pola actividade que teñen as empresas galegas noutros caladoiros, tamén en Arxentina, onde a inflación ou os tipos de cambio de moeda están a xerar incertezas, tal e como o sector trasladou ao presidente do Goberno galego.

XERADORAS DE EMPREGO E RIQUEZA

O mandatario galego puxo en valor o encontro con estas empresas, das que exaltou a súa capacidade para xerar riqueza e emprego tanto en Arxentina como en Galicia e fixo especial fincapé no seu labor no país latinoamericano, onde representan "un valor engadido" para o tecido empresarial galego.

"Gustaríanos que seguise sendo así moito tempo máis", subliñou o presidente autonómico quen, por esa razón, mostrou o desexo do Goberno galego de que as empresas pesqueiras de Galicia poidan seguir operando "nun marco de estabilidade e con condicións favorables".

Alfonso Rueda reúnese con empresas pesqueiras en Arxentina.. XUNTA | Fonte: Europa Press