Déficit na balanza comercial de Galicia: soben as importacións en Galicia un 39% en plena crise
O superávit comercial galego baixa un 46% en agosto.
Por Europa Press / Redacción | Santiago de Compostela | 18/10/2022 | Actualizada ás 13:40
As exportacións galegas aumentaron un 23,8% no mes de agosto en comparación co mesmo período de 2021, mentres que as importacións creceron un 38,9%, segundo datos publicados este martes polo Ministerio de Industria, Comercio e Turismo, que sinalan que o superávit comercial de Galicia descendeu un 46%.
Desta maneira, Galicia exportou aos exterior produtos por un valor de 2.293 millóns de euros no oitavo mes do ano, mentres que importou 2.115 millóns. Ata agosto, Galicia acumula un aumento das exportacións do 28,7%, con 19.211 millóns, así como un incremento das importacións do 37,7%, ata 17.356 millóns.
Con isto, o saldo comercial galego é positivo, con 177 millóns en agosto, un 46% menos que os 329,5 millóns de agosto de 2021, e 1.855 millóns nos oito primeiros meses deste exercicio, un 20,2% menos.
En Galicia as principais exportacións en agosto proviñeron dos sectores de manufacturas de consumo (31,9% do total, incrementáronse un 15,2% interanual), alimentación, bebidas e tabaco (14,5% do total, ascenderon un 17,0% interanual) e produtos enerxéticos (12,8% do total, subiron un 133,9% interanual).
Tal como explica o Instituto Galego de Estarística (IGE), os produtos con maior influencia positiva nas exportacións foron os 'Combustibles, aceites minerais', cun peso do 12,4% sobre o total das exportacións, seguidos dos 'Vehículos automóbiles, tractores', que supuxeron un 21,6% de todas as exportacións galegas.
No ámbito das importacións, os elementos que máis axudaron ao seu incremento foron tamén os 'Combustibles, aceites minerais', que representaron o 20,7% do peso total, así como as 'Pezas de vestir, non de punto', cun 5,6% do total.
