Formoso pide "cláusulas de reto demográfico en contratos públicos" que activen o rural
O presidente da Deputación da Coruña, Valentín González Formoso, instou á Xunta de Galicia a apostar pola cláusula demográfica nas licitacións autonómicas, "dando prioridade ás empresas que se implanten no ámbito rural".
Por Europa Press / Redacción | SANTIAGO DE COMPOSTELA | 18/10/2022 | Actualizada ás 18:55
O presidente da Deputación da Coruña, Valentín González Formoso, propuxo a implantación de "cláusulas demográficas para contribuír a xerar actividade no rural, fixando así poboación e loitando contra os lumes".
Fíxoo nunha xornada en Zamora, no Foro Next Educación sobre Incendios Forestais en España, na que, segundo informa o organismo provincial coruñés, participaron tamén os seus homólogos das deputacións de Zamora, Palencia e Málaga, ademais de responsables de consorcios provinciais de bombeiros, alcaldes, xornalistas e representantes de entidades rurais.
No foro, no que se abordaron as causas e consecuencias dos incendios forestais, Formoso puxo o foco sobre o "abandono do rural" como principal causa para que se produzan incendios.
Por iso, instou á Xunta de Galicia a apostar pola cláusula demográfica nas licitacións autonómicas, "dando prioridade ás empresas que se implanten no ámbito rural" e, por outra, "que se bonifique a aquelas que xeren actividade e postos de emprego, detendo así o despoboamento que se está producindo".
"Con case 200.000 hectáreas queimadas este verán en todo o país, das que a metade foron no noroeste peninsular, e con case 50.000 hectáreas queimadas en Galicia, merece a pena facer unha reflexión profunda de por que ocorre isto e ocorre porque hai un abandono do rural clarísimo, que non se afronta por parte da Xunta de Galicia desde hai anos", afirmou.
González Formoso lembrou que "con máis de dous millóns de hectáreas de bosques" a comunidade galega é unha das autonomías "con maior superficie forestal de España e, aínda así, estamos á cola en superficie forestal protexida".
"Estando só o 15% catalogada como Rede Natura ou Espazo Natural Protexido, 26 puntos por baixo da media española que está no 41", apuntou durante a súa intervención.
