Máis de 6.600 firmas piden no Parlamento seleccións galegas en todas as disciplinas deportivas

A plataforma Vía Galega presentou este mércores un total de 6.644 firmas en apoio a unha Iniciativa Lexislativa Popular para que "todas as disciplinas" deportivas conten cunha selección galega e que estas poidan competir oficialmente e a nivel internacional.

Así o esixiu o portavoz de Vía Galega, Anxo Louzao, que entregou as firmas, xunto a integrantes da plataforma, no rexistro do Parlamento galego e confiou en que a cámara "sexa sensible e razoable" á proposta. Louzao destacou que a ILP ten "o apoio explícito" do BNG, mentres que o PSdeG "non se situou" en cuestións como a posibilidade de competir en torneos oficiais, que, alegan os socialistas, é algo "moi complexo".

En canto aos populares, Anxo Louzao dixo que se comprometeron coa plataforma a "estudar o tema", aínda que aínda non deron unha resposta. "Espero que reflexionen moi profundamente e nos dean o seu apoio", destacou.

Anxo Louzao explicou que a iniciativa recolle "o dereito que ten que ter todo pobo" a ter unha selección propia. "As únicas seleccións que nos identifican aos galegos son aquelas que compomos os galegos", dixo o portavoz de Vía Galega, que reclamou tamén que se conformen "seleccións masculinas e femininas en todos os deportes" e que cando un galego suba ao podio "poida exhibir" a bandeira e escoitar o himno.

"Queremos mostrarnos como nación que somos e competir oficialmente nacional e internacionalmente en todos os deportes", subliñou, tras o que lamentou situacións como a que se deu nos últimos Xogos Olímpicos, onde os deportistas galegos tiveron "grandes resultados" pero Galicia "estivo ausente".

Entregan máis de 6.600 firmas para que as seleccións galegas poidan participar en competicións oficiais. | Fonte: Europa Press