O PP asevera que Ence "non ten ningunha disculpa" para non retomar o seu Plan Social
Considera que é "unha responsabilidade adquirida coa cidade de Pontevedra".
Por Europa Press / Redacción | SANTIAGO DE COMPOSTELA | 19/10/2022 | Actualizada ás 16:33
O portavoz do grupo municipal do Partido Popular de Pontevedra, Rafa Domínguez, reclamou á compañía Ence "que retome con urxencia o seu Plan Social" xa que o considera "unha responsabilidade adquirida coa cidade de Pontevedra".
Nunha rolda de prensa celebrada este mércores, Rafa Domínguez destacou a importancia deste Plan Social, dotado con 3 millóns de euros na súa última convocatoria. "Neste momento a empresa non ten ningunha desculpa para non polo en marcha de novo", aseverou.
Despois de reiterar o seu apoio aos traballadores da fábrica de Lourizán o portavoz local do Partido Popular insistiu na súa demanda. "Quero pedir publicamente que a empresa retome de forma inmediata o Plan Social que tantos beneficios deu a persoas e entidades da nosa cidade que tanto o necesitaban", remarcou.
"É unha responsabilidade adquirida cos pontevedreses", asegurou o popular, que incidiu en que a pandemia "pasou" e aínda "non hai unha data concreta para o recurso sobre a prórroga de Ence". "A empresa debe reiniciar o seu plan social", engadiu. O presidente local do PP afirmou moitos colectivos que eran beneficiarios destas axudas "viron comprometido o seu funcionamento coa suspensión deste Plan Social de Ence".
