O funcionariado autonómico cobrará antes de final de ano a compensación pola suba do IPC
En canto á posibilidade de retomar a xornada laboral de 35 horas semanais, o titular de Facenda sostivo que pode producir "escaseza de persoal nalgunhas áreas nas que fai falta".
Por Europa Press / Redacción | SANTIAGO DE COMPOSTELA | 23/10/2022 | Actualizada ás 13:40
O conselleiro de Facenda e Administración Pública, Miguel Corgos, confirmou este domingo que o funcionariado autonómico cobrará antes de final de ano a compensación pola subida do IPC, o que supón o incremento do 1,5% a maiores do acordado polo Goberno central e os sindicatos para este ano.
Con todo, o conselleiro sinalou que previamente se debe aprobar unha lei para traspor a normativa estatal á galega e que, avanzou, se fará pola vía da lectura única no Parlamento para aprobala "o máis rápido posible".
"Agora nós temos que traspoñela á nosa normativa interna. Como non existe a figura do Real Decreto na Comunidade, teremos que aprobar unha lei que posiblemente sexa de lectura única para aprobar o máis pronto posible este incremento. Posiblemente tentaremos que sexa no mes de novembro e aplicala antes de que finalice o ano", explicou Corgos nunha entrevista na Radio Galega recollida por Europa Press.
En canto á posibilidade de que o funcionariado galego retome a xornada laboral de 35 horas semanais, o titular de Facenda sostivo que pode producir "escaseza de persoal nalgunhas áreas nas que fai falta" e, por iso, "afectar á prestación de servizos públicos". "Xa veremos como se implementa", aseverou. Así mesmo, cualificou de "lamentable" que o Goberno central negocie "estes temas que impactan noutras administracións", engadiu, "sen consultar ás comunidades".
ORZAMENTOS XUNTA E ESTADO
Por outra banda, asegurou que a Xunta quixo poñer o acento dos Orzamentos de 2023 en que fosen "unhas contas útiles para axudar as persoas e as empresas" a superar a situación que "se está volvendo complicada polo incremento dos prezos". "Cremos que necesitabamos unhas contas que fosen o impulso que Galicia necesita", reafirmou Miguel Corgos para posteriormente sinalar que "un dos eixos básicos" é a política social.
Pola contra, Corgos ve "pouco ponderadas" as contas presentadas pola administración central porque "descoidan a necesidade de investimento que se necesita neste momento de retardación da economía". Nesta mesma liña, ve "mellorable" a política fiscal do Goberno central, xa que, argumentou, "podería dedicar máis recursos para rebaixas focalizadas e temporais para aliviar o incremento de prezos".
"Non que se consoliden a longo prazo, pero para medidas puntuais de alivio fiscal si que se podería facer algo máis rebaixando algún tipo básico de IVE", concretou Corgos. Sobre as previsións de crecemento do terceiro trimestre, Miguel Corgos asegurou que aínda non teñen o dato adiantado, aínda que destacou que "o verán foi moi positivo".
En canto á inflación no último trimestre do ano, o conselleiro asegurou que "se non ocorre ningún shock adicional derivado da guerra de Ucraína" como, por exemplo, "un peche abrupto dos mercados de gas e hidrocarburos", espera que os prezos "sigan moderándose e a media anual siga baixando cara a un 8%".
