Por Europa Press / Redacción | SANTIAGO DE COMPOSTELA | 24/10/2022 | Actualizada ás 18:53
Os partidos políticos con representación no Parlamento de Galicia valoraron este luns a enquisa realizada polo Instituto Sondaxe e publicada pola Voz este fin de semana. Así, a líder do BNG, Ana Pontón, sinalou que mostra que o BNG é "a alternativa real" fronte ao PP; o portavoz parlamentario do PSdeG, Luís Álvarez, apelou a "cambiar a tendencia"; e o portavoz dos populares na Cámara galega, Pedro Puy, asegurou que demostra que a substitución na presidencia da Xunta fíxose "razoablemente ben".
A sondaxe reflicte que o PP mantería a maioría absoluta, aínda que con dous deputados menos, mentres que o Bloque crecería, cun escano máis; o PSdeG contaría cun deputado menos pola provincia de Pontevedra; e Galicia en Común aparecería no Parlamento con dous representantes.
Aínda que todos coincidiron en sinalar que "aínda faltan moito" para que se celebren comicios autonómicos, a líder do BNG recoñeceu que "serve para ver cales son algunhas das tendencias" que se están dando en Galicia. Así, destacou da enquisa mostra que o BNG é "a forza que representa a alternativa real fronte ao PP" e que lles sinala que "hai partido".
"O BNG o que vai facer é traballar para que este país teña por primeira vez unha presidenta coas mans libres para defender os intereses dos galegos e levantar un proxecto de futuro para este país e o tempo dirá", expresou.
PSDEG: "ESPAZO DE MELLORA"
Pola súa banda, o portavoz do grupo parlamentario socialista, Luís Álvarez, defendeu que a directiva actual do PSdeG, con Valentín González Formoso á cabeza, leva 10 meses á fronte do partido, polo que considera que "hai un espazo de mellora". Con todo, recoñeceu que a enquisa é "un acicate" para "facelo mellor". "Se algo hai de distinto na forma de actuar desde hai 10 meses é que se antepoñen sempre os intereses de Galicia e esa é unha realidade que a algún partido político non lle resulta interesante", reflexionou.
Así, asegurou que van cambiar "a tendencia" que mostra a enquisa. Ademais, cuestionado sobre unha publicación en Twitter do anterior secretario xeral dos socialistas galegos, Gonzalo Caballero, na que se mostraba "preocupado" por esta sondaxe, Álvarez evitou entrar en polémicas: "Preocupados estamos todos, non só o señor Gonzalo Caballero. O que ten que facer é traballar con todos para que cambie esa tendencia".
PP: "REFORZA E SOBE"
Para o portavoz popular, Pedro Puy, a enquisa recolle que fixeron as cousas "razoablemente ben" despois dun cambio na presidencia da Xunta e na dirección do partido. Aínda que cre que "a xente non está a pensar nunhas eleccións que chegarán dentro de dous anos", valorou que a sondaxe "reforza e sobe" respecto da anterior enquisa de Sondaxe "non só nas xerais, senón nas eleccións autonómicas".
"Creo que iso quere dicir que se entendeu esa operación, que está a consolidar unha maioría e que ademais está a facer que Galicia vaia a mellor neste contexto tan complicado", resumiu Puy.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.