Máis de 67.000 persoas descargaron xa o bono 'Activa Comercio'

Máis de 67.000 persoas xa descargaron o bono 'Activa Comercio' que a Xunta de Galicia puxo en funcionamento este mesmo luns e ao que se adheriron máis de 4.000 establecementos. Así o notificou a administración autonómica nunha nota de prensa na que tamén sinalou que máis de 1.300 bonos se descargaron na provincia de Pontevedra.

Os bonos, en formato de código QR, pódense descargar a través do móbil na web bonosactivacomercio.gal, onde tamén estará dispoñible a lista de establecementos adheridos, á que poderán seguir sumándose comercios ata o próximo 30 de novembro. Este ano, o desconto, que se poderá utilizar ata o 31 de decembro, será de cinco euros para compras a partir de 20 euros e inferiores a 30 euros; 10 euros para compras desde 30 euros e inferiores a 50; e de 15 euros se superan os 50 euros de compra.

Este luns, o director xeral de Comercio e Consumo, Manuel Heredia, visitou diferentes establecementos da localidade pontevedresa de Marín que participan nesta iniciativa á que a Xunta destina cinco millóns de euros coa previsión de chegar a mobilizar 17 millóns de euros en compras no comercio de proximidade de toda Galicia.

O titular de Comercio e Consumo explicou que un dos obxectivos desta iniciativa é incentivar as compras no comercio de proximidade e, ao mesmo tempo, contribuír a aliviar o impacto da inflación na capacidade de gasto dos fogares galegos.