A CIG denuncia ante Inspección de Traballo o "lamentable" estado das motos de Correos
O sindicato acusa a empresa de incumprir a normativa de seguridade laboral ao obrigar por centos de traballadores a "arriscar as súas vidas diariamente na rúa".
Por Europa Press / Redacción | VIGO | 24/10/2022 | Actualizada ás 19:17
A Confederación Intersindical Galega (CIG) denunciou ante Inspección de Traballo o "lamentable" estado das motos de Correos, e acusa a empresa de incumprir a normativa de seguridade laboral ao obrigar por centos de traballadores a "arriscar as súas vidas diariamente na rúa".
Nun comunicado, a CIG indicou que xa advertiu en varias ocasións á compañía da mala situación na que se atopan ditos vehículos e da gravidade que supón isto para a seguridade do persoal.
"Ante a pasividade da empresa, o pasado mes de xullo realizouse un informe pormenorizado de cada unha das motos que prestan servizos nas diferentes unidades. Este foi trasladado á dirección de Correos, reiterando a urxente necesidade de que se adoptasen medidas para previr que en calquera momento haxa que lamentar un fatal desenlace e que compañeiros non teñan que pór en risco a súa integridade física", explicou a organización sindical.
A pesar diso, a CIG criticou que a firma respondeu con algunhas medidas que resultan "irrisorias", polo que o pasado mes de setembro se volveu facer outra revisión dos vehículos. Así, ante a "falta de actuación" de Correos, presentaron denuncia en Inspección de Traballo ao considerar que esta situación "non se pode soster máis no tempo" xa que "se está falando da vida das persoas".
