Detida por un incendio na leira duns veciños cos que estaba enemistada
O lume tivo lugar en Palmeira, Ribeira, o pasado 25 de setembro.
Por Europa Press / Redacción | SANTIAGO DE COMPOSTELA | 27/10/2022 | Actualizada ás 13:39
Unha muller foi detida polo incendio rexistrado o pasado 25 de setembro en Palmeira, no concello coruñés de Ribeira. Segundo informou a Xunta nun comunicado, axentes do Grupo de Investigación de Incendios da Policía Autonómica en Santiago de Compostela, en colaboración coa Unidade de Investigación de Incendios Forestais (UIFO) e os medios de extinción do Distrito Forstal IV O Barbanza, esclareceron o sucedido ene ste incendio forestal.
O lume produciuse no lugar de Palmeira e afectou a 6.800 metros cadrados de superficie arborada. Así, a investigación revelou que se tratou dun incendio "provocado de forma intencionada", que se "iniciou en horas nocturnas á beira dun poste de formigón situado fronte a unha vivenda".
"Como resultado, tomóuselle declaración a unha persoa que mantén disputas cos propietarios dos terreos queimados, como presunta autora do incendio", indica o comunicado. Fontes da Administración autonómica consultadas por Europa Press confirmaron que se trata dunha muller.
Así mesmo, tras a análise da actividade incendiaria nas inmediacións do domicilio da detida e do estudo das declaracións das testemuñas e dos veciños, concluíuse que os nove lumes anteriores orixinados na zona "tiveron orixes similares e poderían ter a mesma autoría".
Desta forma, o ateigado policial foi remitido ao Xulgado de Instrución en funcións de garda de Ribeira. No que vai de ano, a Policía Autonómica detivo ou investigou a 50 persoas como presuntas autoras de incendios forestais.
