Por Europa Press / Redacción | SANTIAGO DE COMPOSTELA | 27/10/2022 | Actualizada ás 14:40
O secretario xeral do PSdeG, Valentín González Formoso, presentou este xoves un documento que, bautizado como 'Plan de Reforzo e Investimento Social e Económico', recolle as súas propostas para "reforzar os servizos públicos e o apoio aos sectores produtivos", entre as que se inclúen un plan de emprego e medidas demográficas.
Nun almorzo informativo en Santiago, o líder do PSdeG reprobou que a proposta da Xunta para os Orzamentos de 2023 "non inviste na protección das persoas" e que o Goberno galego "non está á altura das circunstancias".
Enfrente, propuxo o impulso dun plan de emprego galego que siga o modelo do plan provincial que, baixo o seu mandato, se impulsou na Deputación da Coruña para incentivar a contratación nas pemes, para o que se pretende habilitar unha partida de 100 millóns de euros.
Así, explicou que o plan financiaría os custos laborais ao 100% o primeiro ano, ao 75% o segundo e ao 50% o terceiro, o que "asegura unha permanencia durante 3 anos e onde se constata a necesidade dese traballador". Ademais, segundo explicou, contaría coa habilitación dunha liña de apoio a emprendedores e a creación de coworkings temáticos.
En materia de innovación, Formoso insistiu as medidas "teñen que tomarse de forma transversal entre todas as institucións" e que "se debería que aumentar un 0,4% do Produto interior Bruto (PIB) para o gasto en programas de I+D+i para igualar a media estatal". Tamén, indicou que a situación actual de inflación obriga a "dar resposta ao incremento de custos nos combustibles aos sectores estratéxicos".
RETO DEMOGRÁFICO
O líder dos socialistas galegos mostrouse preocupado ante o reto demográfico e sinalou "que o rural non é sustentable se non hai xente que o sosteña". Disto modo, insistiu en que "é necesaria a implantación de cláusulas demográficas nas contratacións que se fagan desde a administración pública para primar aos territorios lastrados pola perda de habitantes".
Ademais, propuxo a creación de bonificacións económicas e incentivos fiscais para as empresas que se radiquen en espazos que sofren regresión demográfica e insistiu na habilitación dun plan especial de investimentos para reforzar a prestación de servizos públicos nas zonas rurais.
PLAN PARA A ATENCIÓN PRIMARIA
Formoso insistiu tamén en que "a sanidade é unha das grandes preocupacións dos galegos" e que "hai que investir nun plan urxente e con medidas claras no ámbito da Atención Primaria".
Nesta liña, subliñou que o investimento en Atención Primaria "debería aumentar un 24%, na mesma proporción que crecer as transferencias do Estado a Galicia para financiar os servizos públicos". Ademais, propuxo un plan de choque para reducir as listas de espera a un máximo de 48 horas e o encargo dunha auditoría sobre o volume de derivación de pacientes á sanidade privada.
INVESTIMENTO EN EDUCACIÓN
Formoso criticou que a Consellería de Cultura, Educación e Universidades ten "un investimento adscrito un 5% inferior á doutros departamentos da Xunta".
O plan dos socialistas neste ámbito contempla medidas como a implantación da gratuidade dos libros de texto ou a habilitación dun programa de bolsas de alimentación para o alumnado con menos recursos que carece de comedores.
Na educación superior, sinalaron que as matrículas para universitarios de primeiro curso con rendas familiares inferiores a 52.000 euros de deberían de ser gratis.
POLÍTICA SOCIAL
Os socialistas sinalaron que a proposta para os orzamentos da Xunta "non teñen en conta a desaceleración económica nin recoñecen a previsión de destrución de emprego" e que "a política social é un tema preocupante".
Así, volveron a reclamar a reposición da 'Tarxeta Básica', "que chegou a beneficiar a 55.000 persoas en Galicia" e pediu "a triplicación da dotación do bono social eléctrico "co fin de chegar a 18.000 persoas".
DERROGAR A BONIFICACIÓN DO IMPOSTO DE PATRIMONIO
Doutra banda, os socialistas destacaron que o plan que elaboraron prevé a derrogación da bonificación do imposto de Patrimonio que "supón unha rebaixa de 4.400 euros aos máis ricos, mentres a rebaixa ás rendas medias vía IRPF é de 46 euros".
Ademais, propuxo deixar sen efecto a rebaixa do 40% dos impostos a bingos e casas de apostas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.