Convocada unha concentración en Xeal ante os recortes nos prezos do servizo e por un futuro industrial
O comité de empresa indicou que XEAL incumpre as cláusulas das concesións hidroeléctricas "de maneira reiterada".
Por Europa Press / Redacción | SANTIAGO DE COMPOSTELA | 31/10/2022 | Actualizada ás 18:32
O comité da compañía Xallas Electricidade e Aliaxes (XEAL) convocou unha concentración o próximo 3 de novembro ás 18,30 horas fronte ás oficinas de Portos de Galicia en Corcubión para mostrar o seu rexeitamento á supresión do servizo de pilotaxe e o traslado do guindastre do porto de Brens, así como para reclamar un futuro industrial e emprego na comarca.
Nunha nota de prensa, o comité de XEAL criticou a decisión da Xunta de recortar á metade os prezos do servizo, o que "provocou que a licitación quede deserta" e que "o porto quede inutilizado para poder descargar a materia prima para as fábricas e cargar o produto elaborado para a súa venda".
Ademais, sinalaron que esta decisión do Goberno galego é "un duro golpe á continuidade produtiva das fábricas de ferroaliaxes e ao mantemento dos postos de traballo".
Así mesmo, o comité de empresa indicou que XEAL incumpre as cláusulas das concesións hidroeléctricas "de maneira reiterada". No comunicado subliñan que o obxectivo da empresa "é pechar as fábricas e quedar co substancioso negocio de produción de electricidade", e que isto "evidénciano as solicitudes administrativas que fixo para incrementar a xeración de enerxía".
O comité define á Xunta como "cómplice do desmantelamento" e fai un chamamento á cidadanía para que se some á concentración "en defensa do futuro da comarca" o vindeiro xoves.
