Arranca o Outono Códax 2022 co concerto de Daddy Long Legs en Santiago
O cuarteto de garage-rock chega dende Nueva York para abrir esta 12ª edición do festival.
Por Galicia Confidencial | SANTIAGO DE COMPOSTELA | 02/11/2022 | Actualizada ás 13:33
Arranca o Outono Códax 2022 por todo o alto. Para a apertura da súa 12ª edición, o festival compostelán de músicas negras propón unha descarga de garage-rock con marcadas influencias das músicas de raíz norteamericanas da man da banda neoiorquina Daddy Long Legs.
Chegan no seu novo formato de 4 membros, con Dave Klein (teclados), Brian Hurd (voz, harmónica e guitarra), Murat Akturk (guitarra slide) e Josh Styles (batería). O cuarteto está influenciado por xente como Son House, Captain Beefheart, Howlin' Wolf, MC5 e Dr. Feelgood e o seu son personifica o garage-rock e o punk cunha crueza contemporánea.
Dende a súa formación en 2010, a banda editou tres discos de estudo, un álbum en vivo, e 5 sinxelos, tres deles no selo español FOLC Records.
ENTRADAS
As entradas poden conseguirse na Reixa-Matrioska (Compostela); Bonus Track (Ourense); Rock Box (A Coruña); Elepé e Honky Tonk (Vigo; Carnaby (Pontevedra); ou a través da venda online en www.ataquilla.com.
