Por E.P. | SANTIAGO DE COMPOSTELA | 03/11/2022 | Actualizada ás 21:00
A Coruña presentou este xoves, no Palacio de Congresos e Exposicións (Palexco), a candidatura desta cidade como sede da Axencia Española de Supervisión de Intelixencia Artificial (Aesia).
Foi despois de que a Xunta dese o apoio a esta urbe para optar a ser sede desta entidade e despois de que, inicialmente, se postulasen tamén as de Santiago de Compostela e Ourense. Agora A Coruña competirá con outras cidades españolas.
O acto contou coa presenza da alcaldesa herculina, Inés Rey, e tamén de autoridades como o presidente da Xunta, Alfonso Rueda, entre outros.
Nel, a rexedora coruñesa apelou ás empresas vinculadas ao sector do TIC nesta área e incidiu en que A Coruña "cumpre cos requisitos fundamentais" para ser sede da Aesia.
"Un ecosistema e un polo de innovación e de atracción de talento", dixo tamén sobre o que ofrece neste ámbito e aludindo tamén aos estudos vinculados coa informática e a propia intelixencia artificial na UDC.
Ademais, dixo que o "gran punto forte" da Coruña é o seu "ecosistema empresarial". Tamén destacou o apoio do tecido asociativo, empresarial e institucional para que a cidade sexa sede da Aesia.
CHAMAMENTO Á UNIDADE
O mesmo fixo o presidente da Xunta, Alfonso Rueda, que, como a alcaldesa, definiu á Coruña como "candidatura galega", aludindo á "unidade", á que tamén fixo referencia o reitor da Universidade da Coruña, Julio Abalde, e o presidente da patronal galega, Juan Manuel Vieites.
"Temos argumentos dabondo", sinalou Rueda ao considerar que A Coruña e Galicia deben acoller esta sede. Para iso, destacou o apoio de organismos e empresas. "Non é mala a competitividade, pero é mellor a unidade", dixo despois de que inicialmente Ourense e Santiago tamén se propuxesen para acoller a sede.
Ademais, aludiu ao "talento e a capacidade de innovación" existente tanto na área coruñesa como en Galicia, en liña co exposto tambien polo reitor da UDC que remarcou o traballo "transversal" no ámbito do sector do TIC.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.