A antropóloga María Martinón, figura científica de referencia no V premio Stephen Hawking

O IES Rosalía de Castro de Santiago de Compostela presenta as bases da quinta edición do Premio Stephen Hawking, no que poden participar todos os centros galegos de Bacharelato, dirixido especialmente aos que imparten a modalidade STEM (Ciencia, Tecnoloxía, Enxeñaría e Matemáticas), que son arredor de medio cento en Galicia. "Creatividade, Cooperación e Coñecemento" é o lema escollido para orientar o desenvolvemento dos traballos, mentras que a directora do Centro Nacional de Investigación sobre a Evolución Humana, María Martinón, será a madriña ou figura científica de referencia nesta quinta edición.

Segundo indican os organizadores do premio, as liñas que poderían seguirse son a figura de María Martinón e a súa achega á investigación sobre a evolución humana. Tanmén investigacións que permitan aplicar as ideas básicas que suxire o lema desta edición ás diferentes materias, tanto de carácter científico coma humanístico. 

Ao concurso pódense presentar traballos de índole artística, ademais dos ámbitos da bioloxía e xeoloxía, da física e química, das matemáticas, do tecnolóxico e das ciencias sociais. Os coordinadores da convocatoria, Suso Fidalgo y Charo García-Echave, indican que o premio pretende fomentar nos mozos o afán por investigar desde idades temperás, así como as vocacións científicas.