O BNG reclama ao Estado máis de 30 millóns en investimentos para Pontevedra nas súas emendas aos orzamentos

A contratación do segundo tramo da Autovía A-57, que se complete o paseo litoral a Marín, a execución do Nó de Bombeiros, a recuperación do antigo edificio de Facenda, a rehabilitación de Santa Clara ou melloras de seguridade nalgúns viarios son algúns dos elementos incluídos nas emendas presentadas polo BNG aos Orzamentos Xerais do Estado en relación á cidade de Pontevedra, uns investimentos que cuantifican en 30 millóns de euros.

En total, o BNG presentou 350 emendas para o conxunto de Galicia, aínda que o Goberno xa "vetou" 50 delas, segundo comentou o deputado nacionalista Néstor Rego, que compareceu este luns xunto co alcalde da cidade e candidato á reelección polo BNG, Miguel Anxo Fernández Lores.

Durante a súa intervención, o rexedor nacionalista insistiu en que "os investimentos do Estado en Pontevedra se eternizan dunha maneira incrible" e citou o exemplo a Autovía A-57, cuxas obras arrincaron en outubro de 2015 e que, despois de sete anos, seguen estando ao 77% de execución.

Lores asegurou que este problema se repite co resto dos investimentos comprometidos polo Estado e que o BNG, nas súas emendas, volverá esixir a execución destes proxectos, segundo sinalou o alcalde.

O alcalde tamén se referiu a outras cuestións nas que "nin fan nin deixan facer", como os máis de dous anos que leva agardando o Concello por unha autorización de Costas para construír un viario na zona de Mollabao.

Tamén reclaman á Administración central a rexeneración do bordo marítimo en ambas as marxes da Ría de Pontevedra, así como o seu dragado para aumentar a produción marisqueira, aínda que esta proposta forma parte dunha emenda global que alcanza outras rías galegas.

O deputado do BNG, pola súa banda, considerou as contas do Estado para 2023 "insuficientes e decepcionantes" para Galicia e reclamou un "esforzo maior" en gasto social.

Paralelamente, reprochou ao Executivo de Pedro Sánchez que "acabe de aumentar en 3.000 millóns de euros o gasto militar", incidindo en que ese diñeiro "debería ser destinado a políticas sociais, ás axudas aos sectores máis vulnerables, a aumentar a pensión mínima e á política de vivenda ou de xeración de emprego".

En canto ás infraestruturas ferroviarias, Néstor Rego explicou que o BNG pedirá nas súas emendas a habilitación de servizos de proximidade para as áreas metropolitanas de Galicia, que se complete a rede interna de tren e que se execute a conexión coa alta velocidade cara ao Porto e Lisboa.