Santiago traballa "con dificultades" nos orzamentos para 2023 co aumento do gasto de persoal e o custo da luz
Por E.P. | SANTIAGO DE COMPOSTELA | 17/11/2022 | Actualizada ás 14:02
O alcalde de Santiago, Xosé Sánchez Bugallo, explicou que "están a traballar" nos orzamentos para 2023 "con algunhas dificultades", polo "crecemento do gasto de persoal que roldará os dous millóns de euros" e tamén "coa incógnita" do custo da luz.
Así, a preguntas dos xornalistas respondeu este xoves que "o que non haxa orzamentos novos, non significa que non existan orzamentos", o que se fai, en palabras de Bugallo, é unha prórroga dos do ano anterior.
"Quere dicir que todo o que estaba previsto no 2022 vai seguir orzado nas mesmas condicións para 2023. Por tanto, é unha situación que non presenta enormes dificultades de xestión, polo menos, a curto prazo", puntualizou.
O pasado martes Bugallo xa se refería ao proceso de elaboración dos orzamentos para o ano próximo, e explicou que hai "determinadas prioridades" que hai que "despexar antes" e aludiu a unha "regularización de pagos" que se está pechando (calcula que quedará resolta este mes) e a "algunha indeterminación sobre o custo definitivo" da subministración eléctrica.
