A estratexia de xestión do cancro implanta un programa de seguimento para pacientes que acaben o tratamento

A Estratexia de Xestión do Cancro en Galicia aprobada pola Xunta de Galicia implantará un novo programa asistencial de seguimento para as persoas que finalicen un tratamento oncolóxico.

Así o avanzou o conselleiro de Sanidade, Julio García Comesaña, este venres durante a súa intervención no II Congreso de Persoas con Cancro e Familiares: 'Galicia fronte ao cancro, facendo camiño', organizado pola Asociación Española contra o Cancro de Pontevedra e celebrado en Vigo.

A estratexia, sinalou Comesaña, inclúe tamén a creación dunha rede colaborativa con atención primaria e outras especialidades para a formación en determinadas patoloxías oncolóxicas, sobre todo aquelas que requiran un diagnóstico precoz ou nas que a sospeita diagnóstica sexa complexa.

Tamén o deseño de algoritmos que, mediante a utilización da historia clínica electrónica e o Big Data da Consellería, permitan identificar os factores de risco das distintas enfermidades oncolóxicas; establecer perfís de antecendentes e predisposición á enfermidade, e identificar as persoas sobre as que actuar.