Novos símbolos para as bandeiras dos municipios de Abadín e Mugardos

A directora xeral de Administración Local, Natalia Prieto, presidiu este luns a reunión da Comisión de Heráldica na que se informou de maneira favorable sobre a proposta para que sexan aprobados polo Consello da Xunta o escudo e a bandeira do concello de Abadín e a bandeira do municipio de Mugardos.

Con iso, o Goberno autonómico leva aprobados un total de 277 escudos e bandeiras das entidades locais de Galicia no seo da Comisión Heráldica da Xunta, tras a petición dos respectivos concellos de modificar ou rehabilitar os seus símbolos para adaptalos ao decreto que os regula.

Segundo explicou Natalia Prieto, os municipios e as demais entidades locais de Galicia poderán adoptar escudos heráldicos e bandeiras propios e privativos, modificar os xa existentes ou rehabilitar os que historicamente se empregaron, baseándose sempre en feitos históricos ou xeográficos característicos e peculiares do seu territorio e conforme ás normativas de heráldica.

Ningunha entidade local de Galicia poderá utilizar escudo heráldico ou bandeira que non fosen aprobados polo Consello da Xunta, sen prexuízo daqueles que foron aprobados pola Administración do Estado con anterioridade á transferencia de competencias a favor da Comunidade Autónoma de Galicia.

Bandeira oficial de Mugardos | Fonte: Arquivo