O alcalde de Ourense desafía o Nadal de Caballero: "O que di é ciencia ficción"

Promete ter a iluminación "máis rechamante" de Galicia.

Por Europa Press / Redacción | SANTIAGO DE COMPOSTELA | 23/11/2022 | Actualizada ás 20:35

Comparte esta noticia

A iluminación do Nadal de Ourense acenderase o 2 de decembro. Así o anunciou o rexedor municipal, Gonzalo Pérez Jácome, que ademais adiantou que "terá un terzo das lámpadas de Vigo" e, aínda así, esgrimiu que "será a iluminación máis rechamante de Galicia". Fíxoo entre críticas ao que denominou como a "ciencia ficción do alcalde de Vigo", Abel Caballero.

Así se pronunciou no marco da presentación do concurso de escaparates de Nadal para "apoiar o comercio local e dinamizar a cidade". Un concurso que repartirá un total de 8.000 euros en premios, o primeiro escaparate recibirá 3.000, o segundo 2.000, o terceiro 1.000 e haberá catro accésit de 500 euros.

"O aceso das luces ten relación con isto dos escaparates porque ambos van embelecer a cidade durante uns días dunha forma moi relevante", dixo Pérez Jácome, explicando que o acendido será o día 2 de decembro ás 20,00 horas e que dará "moitísima alegría nas rúas e moitísimo ambiente".

"Teremos en Galicia por primeira vez pórticos, que serán os que decoren a rúa do Paseo", garantiu o rexedor engadindo que se trata da cuarta vez que se pon esta decoración nunha cidade europea, "instaláronse en Alemaña, en Málaga e noutra cidade andaluza e agora en Ourense", dixo sostendo que "a iluminación será espectacular".

Neste sentido, prometeu que "a iluminación máis rechamante de toda Galicia vai ser a de Ourense" e "unha das máis rechamantes de toda España", engadindo ademais que a cidade conta con outros "dous potenciais", "a Praza Maior coa carpa que vai estar espectacular e a árbore máis alta de Galicia".

REPERCUSIÓN ECONÓMICA

En canto ao custo da iluminación, "suporá 500.000 máis IVE" e unha repercusión da que "aínda non hai datos". O que prevé Jácome é que "vai aumentar o número de visitantes", pero dixo que non vai facer " ciencia ficción como fai o alcalde de Vigo", sobre o que lembrou que "unha vez na televisión dixo que o retorno de Vigo era de 500 millóns de euros, posiblemente non sexa nin de 30 nin de 20".

Ademais criticou que o alcalde de Vigo, Abel Caballero, "dicía que xa teñen todos os hoteis cheos e calquera persoa pode entrar a internet e verá que non están cheo". "Hai prazas para todo o Nadal e a prezos máis ou menos estándar", agregou.

Rúa do Paseo de Ourense, no pasado nadal
Rúa do Paseo de Ourense, no pasado nadal | Fonte: Rosa Veiga - Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Gamela

Basta con que faga declaracións sensatas en relación ás pantasmadas de Abel Caballero para que este rapaz sexa unha persoa digna na política ficción galega ! Bo Nadal Ourense !