"Toda Galiza", o cartón non oficial do BNG para viaxar por 30 euros en todo o transporte público galego

A portavoz nacional do BNG, Ana Pontón, presentou este luns un cartón simbólico baixo o nome 'Toda Galiza', coa que os nacionalistas reclaman unha tarifa plana de 30 euros para poder moverse por toda Galicia en todos os transportes públicos: tren, bus, barco e taxi rural.

Acompañada de deputados e cargos locais do BNG, Pontón, que lembrou que esta proposta xa a levan nas súas emendas aos orzamentos (nos 50 millóns para mobilidade), sinalou que á marxe de que se acepte a súa incorporación nas contas, trátase dunha cuestión na que teñen que traballar da man Xunta, municipios e Goberno central.

Pontón manifestou que, da man desta iniciativa, debe incorporarse tamén un incremento dos servizos de transporte público, singularmente de horarios e frecuencias. "É importante pór encima da mesa pór medidas que axuden á mobilidade e que axuden ás maiorías sociais nesta crise de prezos", salientou.

Pontón fixo fincapé nas necesidades de mobilidade por razón de traballo ou lecer para facer as xestións ou ir ao médico", polo que "hai que dar unha resposta ás familias, á clase traballadora e á maioría social á altura da crise prezos", o que fai que se "estea convertendo nun luxo para moitísimas persoas" encher o depósito do vehículo.

Con este cartón, salientou, ademais de axudar a chegar a final de mes, o BNG quere tamén promover o uso do transporte público e, por tanto, unha mobilidade "sustentable". "Temos que dar unha resposta á altura do momento", aseverou.

HABITUAIS EN EUROPA

A líder nacionalista defendeu que este tipo de cartóns son habituais en Europa e, por iso, animou á Xunta a "chegar a un acordo" con Estado e concellos. Neste senso, indicou que a intermodalidade "é moito máis que a posta en marcha dunha infraestrutura", e por iso "ten que haber horarios e tarifas atractivas e conexións adaptadas ás necesidades e á realidade das persoas usuarias".

"É unha medida importante para axudar ás persoas que peor o están pasando coa crise de prezos, facer unha aposta polo transporte público e fomentar unha mobilidade que non discrimine ás persoas en función do seu nivel de renda", indicou.

Pontón dirixiuse ao PP para que "acolla esta proposta", sabendo que unha política integral de fomento do transporte público non se acaba nesta iniciativa, pero que contribuiría a esta cuestión.