Concurso de relatos da Deputación de Pontevedra para alumnado de secundaria sobre violencia machista
O concurso, aberto ata o 30 de xaneiro de 2023, premiará os mellores relatos elaborados polos mozos que partan da denuncia do carácter machista dunha canción e "reflexionen para construír o mundo e as relacións desde o feminismo".
Por E.P. | SANTIAGO DE COMPOSTELA | 04/12/2022 | Actualizada ás 16:49
A Deputación de Pontevedra lanzou 'Cambiemos o conto', un concurso de relatos dirixido ao alumnado de ESO, Bacharelato, FP Básica ou Grao Medio para "incentivar nos mozos o pensamento crítico e sensibilizalos na igualdade e na loita contra as violencias machistas".
Explican nun comunicado que o certame xorde enmarcado nos actos do primeiro aniversario do 'Manifesto de Soutomaior', o documento asinado hai un ano por mulleres da cultura no que denunciaban as diferentes situacións de desigualdade que existen no mundo da escritura e no que se propuxo un plan de acción para acabar con elas.
O concurso, aberto ata o 30 de xaneiro de 2023, premiará os mellores relatos elaborados polos mozos que partan da denuncia do carácter machista dunha canción e "reflexionen para construír o mundo e as relacións desde o feminismo".
Haberá tres premios para ESO e outros tres para Bacharelato, FP Básica ou de Grao Medio e os galardóns, iguais para ambas as categorías, serán tanto para os centros educativos como para os mozos gañadores.
Os relatos deben contar con entre 3.500 e 7.000 caracteres a partir dunha estrofa ou verso dunha canción que se escoite na contorna da mocidade, denunciando o seu carácter machista e "facendo fincapé na necesidade de configurar un mundo feminista, libre de violencias machistas e igualitario".
A participación no concurso é individual e cada concursante poderá presentar unha única proposta. Será o centro educativo, a través dunha persoa responsable, o que envíe a participa.igualdade@depo.gal cada un dos relatos, en formato PDF, e identificados o nome do participante, curso e nome do centro.
O primeiro premio consistirá nunha actuación musical ou encontro cunha escritora galega para o centro educativo e un computador portátil para o estudante; o segundo premio, un encontro cunha escritora galega e unha tablet para o mozo; e o terceiro premio, a realización dun taller 'Mudando letras' para o centro e un agasallo didáctico para o estudante.
Con motivo do primeiro aniversario do Manifesto tamén se acordou pór en marcha os premios literarios 'Hai unha voz', para recoñecer o papel das escritoras, así como un observatorio sobre a situación das mulleres na literatura e unha biblioteca dixital de mulleres na escritura.
