Por Europa Press / Redacción | SANTIAGO DE COMPOSTELA | 05/12/2022 | Actualizada ás 13:31
A Sala de Goberno do Tribunal Superior de Xustiza de Galicia (TSXG) acordou eliminar as medidas sanitarias adoptadas como consecuencia da pandemia do Covid-19 nas salas de vistas durante a celebración de actuacións xudiciais, así como as vixentes noutras dependencias e espazos comúns dos edificios.
Tal como informou o TSXG nun comunicado, o obxectivo é "restablecer no posible" a situación ordinaria e de normalidade anterior ao estado de emerxencia. Desta forma, ordenou eliminar, de modo inmediato, "todos os elementos que dificulten o acceso aos edificios e, en especial, dos profesionais", entre os que puxo como exemplos "timbres, cadeas, armarios ou mesas".
Na revisión do protocolo, a Sala de Goberno especificou que se deben retirar de todas as sedes xudiciais galegas os carteis indicativos das medidas suprimidas para "restablecer no posible a situación ordinaria e de normalidade anterior ao estado de emerxencia, sen prexuízo das medidas puntuais acomodadas a cada situación particular que poida adoptar cada xuíz en exercicio das facultades de policía de estrados que ten atribuídas ou as que poidan adoptar os decanatos no exercicio das súas competencias".
Entre outras cuestións, o TSXG tamén recomendou aos profesionais que asisten a audiencias públicas o uso de toga, pois entende que así o require "a dignidade e a solemnidade" destas actuacións. Por outra banda, acordou manter a forma de celebración das actuacións procesuais (posibilidade de facelas de telematicamente) e as medias relativas á atención ao público recollidas no protocolo (excepto as sanitarias indicadas antes).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.