Por Galicia Confidencial | SANTIAGO DE COMPOSTELA | 08/12/2022 | Actualizada ás 16:56
A CIG culpabiliza á conselleira de Política Social, Fabiola García, da grave situación de convivencia e sen dotación de persoal adecuada para os coidados de ingresos de residentes con patoloxías psiquiátricas. Segundo sinala nun comunicado, a conselleira “está a encher” as Residencias de Maiores da Xunta de pacientes menores de 65 anos “con graves problemas de conducta e sociabilidade, que de ningún xeito poden convivir con normalidade co tipo de residentes que están ingresados nas Residencias”.
Ademais, tamén sinala o “malestar” que sofren o persoal e os residentes ao non contar coas prestacións adecuadas para o seu coidado. “Non existen espazos habilitados para residentes con problemas graves de saúde mental, non se lles da coidados especiais e nin os psicoxeriatras que regularmente atendían estas patoloxías en pacientes de mais de 65 anos queren atender”, explica.
Subliña que a conselleira Fabiola García “non adecuou as plantillas de persoal para atender a estes pacientes” e que as residencias que están vivindo esta situación “son unha fonte permanente de conflitos e alteran o normal día a día do resto de residentes”.
Por iso, a CIG solicita a dimisión da conselleira por “ser a responsable desta situación que está a alterar e por en perigo a convivencia e o traballo do persoal nas Residencias de Maiores”. Así mesmo, tamén sinala que a secretaria xeral, Francisca Gómez, ten que asumir as súas responsabilidades “para evitar un problema que está a causar baixas de persoal e moito medo entre os residentes maiores de 65 anos”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.