Formoso pide "axilizar" os parques eólicos: "Putin deunos a razón sobre que a enerxía é o sangue que corre polas veas da economía de Galicia"

O secretario xeral do PSdeG, Valentín González Formoso, instou á Xunta a "axilizar administrativamente" aqueles parques eólicos vinculados á "supervivencia" dos proxectos industriais estratéxicos para Galicia para os que "hai de data límite o 31 de xaneiro".

Formoso reuniuse este mércores en Santiago de Compostela para facer un seguemento do pacto pola enerxía sustentable. Así, no encontro participaron as diferentes asociacións que asinaron o acordo (UGT, CCOO, Unións Agrarias e a Federación de Asociacións de Mulleres Rurais de Galicia).

"O tempo, por desgraza, deunos a razón. Putin, por desgraza, deunos a razón, de que a enerxía é o sangue que corre polas veas da economía de Galicia. Que a enerxía é un elemento a ter en conta e a regular, un elemento cun protagonismo público claro e que non podemos agachar a cabeza ante a realidade que vén de cambio de sistema revolucionario nas fontes enerxéticas", apuntou Formoso tras a reunión.

Así, o responsable socialista sinalou que o que "deberían facer desde hai tempo" as diferentes administracións é "sentar nunha mesa", seguindo o exemplo do pacto promovido polo PSdeG, "deseñando a aplicación da que é protagonista Galicia na revolución enerxética que está a chegar".

Nesta liña, lembrou que este pacto foi creado antes da guerra de Ucraína para falar da enerxía e do seu protagonismo na economía, nas familias e nas empresas galegas. "Da súa importancia para o mantemento da sustentabilidade do tecido produtivo do país", incidiu.

O xefe de filas dos socialistas esgrimiu que Galicia "ten que ter ese camiño" que inicia a Unión Europea de forma urxente, o cal pasa por "cambiar de modelo eléctrico europeo para non depender de gas ruso nin alxerino, senón depender de fontes renovables e xerados con recursos autóctonos propios".

PROTAGONISMO "CLARO" DE GALICIA

Así, apuntou que cre que Galicia ten que ter un protagonismo claro. Primeiro "na forma de aterrar" ese novo modelo que, "como di o propio pacto", é un modelo "respectuoso" co territorio, cos seus propietarios e onde a axilidade "sexa a norma", aínda que incidiu en "nunca a cambio de sacrificar" os bens patrimoniais, ambientais e de propiedade privada nos que se desenvolve esa actividade enerxética.

"Non queremos ser copartícipes de ningún fracaso industrial que teña que ver coa falta de seriedade, de solvencia, coherencia e valentía á hora de dirixirnos á sociedade galega cando falamos de parques eólicos que non son especulativos", apuntou Formoso.

Ante isto, fixo un chamamento a solucionar, antes do 31 de xaneiro, todos os proxectos que "están en risco" se as administracións autonómica e central "non son capaces de garantir" unha tramitación urxente que facilite a súa viabilidade.

O secretario xeral do PSdeG, Valentín González Formoso, tras a reunión de seguemento do pacto por unha enerxía eólica sustentable para Galicia | Fonte: PSdeG