Suspendidos este xoves uns 800 xuízos e vistas en Galicia pola folga de letrados da Xustiza
Fontes do Colexio Nacional aseguran que "todo apunta" a que os paros "serán indefinidos" o próximo mes de xaneiro.
Por E.P. | VIGO | 15/12/2022 | Actualizada ás 15:03
A folga de letrados da Administración de Xustiza convocada para este xoves suspendeu nesta xornada, segundo datos provisionais, a celebración duns 800 xuízos e vistas na comunidade galega.
A folga, convocada polo Colexio Nacional de Letrados da Administración de Xustiza, a Asociación Independente de Letrados e a Unión Progresista de Letrados, tivo un seguimento na comunidade galega este xoves do 73%, un punto máis que na xornada deste mércores, 14 de decembro.
Así o sinalaron fontes do devandito Colexio consultadas por Europa Press, un feito que supón un incremento no seguimento dos paros en Galicia na xornada deste xoves de tres puntos con respecto ás folgas levadas a cabo o pasado mes de novembro. No que respecta a todo o territorio español, a folga de letrados desta xornada tivo un seguimento do 73,5% e deixou máis de 10.000 xuízos e vistas suspendidas.
ESIXENCIAS DOS LETRADOS
As tres entidades convocantes da folga xa indicaron nun comunicado conxunto o pasado mes de novembro que "todo apunta a que os paros serán indefinidos" o próximo mes de xaneiro se o Ministerio de Xustiza non atende as esixencias dos letrados, que piden que se lles apliquen "os mesmos criterios que teñen o resto de funcionarios" que dependen do Departamento, o que levaría melloras retributivas para o Corpo.
Entre os puntos destacados no devandito comunicado atópase a "cláusula de enganche" de retribución dos Letrados da Administración de Xustiza (LAJs) que piden que se inclúa, vía emenda, na Lei de Eficiencia Organizativa que actualmente se debate no Congreso.
As organizacións convocantes tamén subliñaron a petición de redución dos grupos de poboación de cinco a tres, unha medida que, segundo indicou o Colexio Nacional nun comunicado previo, "suporía a aplicación das mesmas contías por complemento xeral de posto existentes actualmente, como os médicos forenses, aos Letrados de Xustiza".
