A Deputación de Pontevedra renova con fondos europeos a iluminación exterior de 18 concellos
Por E.P. | Pontevedra | 17/12/2022 | Actualizada ás 18:47
A Deputación de Pontevedra anunciou que renovará a iluminación exterior de 18 concellos da provincia a través do apoio do Instituto para a Diversificación e Aforro de Enerxía (IDAE), que achega máis de dous millóns de euros ao amparo do programa DUS 5000 no marco do Plan de Recuperación.
Así, segundo destacou a institución provincial, esta achega supón o 85% dos 2,4 millóns de euros cos que os municipios de Cerdedo-Cotobade, Cuntis, Fornelos de Montes, Pazos de Borbén, Meaño, Meis, Pontecesures, Ribadumia, Dozón, Rodeiro, Silleda, O Rosal, Tomiño, A Cañiza, Arbo, Covelo e Salvaterra do Miño poderán renovar a súa iluminación exterior.
A Deputación detallou que se actuará sobre un total de 3.877 luminarias, que se reformarán ou substituirán por outro tipo led máis eficientes, e en 148 cadros de mando, que se adaptarán á lexislación vixente e pasarán a contar cun sistema de telexestión, cun aforro enerxético medio estimado do 60%.
