Por E.P. | SANTIAGO DE COMPOSTELA | 19/12/2022 | Actualizada ás 14:55
A 'Fundación Paideia Galiza' será a encargada de desenvolver a nova 'Aceleradora Cultural de Proxectos Musicais' que impulsará ata 12 propostas de diferentes artistas e grupos galegos "emerxentes". Este é o resultado dun concurso público iniciado a mediados de novembro.
O conselleiro de Cultura, Educación, FP e Universidades, Román Rodríguez, asinou a mañá deste luns coa presidenta da entidade, Sandra Ortega, o convenio que formaliza esta colaboración. Este proxecto suporá un investimento de 240.000 euros para a Xunta.
A "aceleradora" ten como obxectivo estimular a profesionalización do sector e "dar impulso" á carreira de artistas que comezasen a súa produción musical recentemente. Ata o 28 de decembro seguirá aberto o prazo de solicitude para que profesionais e microempresas galegas musicais, cun máximo de cinco anos de actividade no sector, poidan beneficiarse desta iniciativa, que apoiará entre catro e 12 proxectos diferentes.
A Xunta explica que se destinan preto de 180.000 euros para facilitar aos participantes as ferramentas necesarias para o desenvolvemento das súas carreiras, mentres que os 60.000 euros restantes corresponden aos gastos de xestión.
UN PROXECTO EN DÚAS FASES
Pola súa banda, a entidade colaboradora asume a organización do programa ao redor de dúas fases, comezando por unha "etapa de consultorías", tanto presencial como telemática, que inclúen diferentes accións de mentorización de cada un dos proxectos escollidos, con consellos sobre a proposta artística, produción, promoción e comercialización.
Esta primeira etapa, que suporá máis de 70 horas de actividade, incluirá a creación e gravación dos produtos musicais, así como a elaboración dos seus plans de negocio. A segunda fase dedicarase á promoción dos proxectos a través da súa participación en circuítos de concertos, festivais, encontros cos medios de comunicación e asistencia a foros e mercados profesionais, dentro e fóra de Galicia.
A fundación concluirá o seu labor na "aceleradora musical" coa organización dun evento final, no que se presentarán todas as propostas musicais, que incluirá actividades de 'networking' e reunións personalizadas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.