Rueda nega que o galego sexa menos falado que o castelán e reivindica a "cordialidade lingüística" de Galicia
O INE situaba esta semana o galego por debaixo do castelán como lingua usada con máis frecuencia.
Por Europa Press / Redacción | SANTIAGO DE COMPOSTELA | 22/12/2022 | Actualizada ás 17:36
O presidente da Xunta, Alfonso Rueda, reivindicou a "convivencia" e a "cordialidade lingüística" que se promove en Galicia e que, baixo o seu punto de vista, ten a obriga de impulsar o Executivo autonómico, tras ser preguntado pola caída no uso do galego.
En concreto, manifestouno despois de facerse público esta semana o censo do Instituto Nacional de Estatística (INE) que, con datos de 2021, sitúa por primeira vez o castelán como a lingua usada con máis frecuencia en Galicia.
Na súa resposta, Rueda remitiuse a un informe do Instituto Galego de Estatística (IGE) que, con datos previos ao estudo do INE, apunta que "o uso do galego é maioritario, cun 51,8 %, sobre o uso do castelán".
Máis aló, reivindicou que a obriga da Xunta é facilitar a convivencia e a cordialidade lingüística, e que "a maioría da poboación" di "falar e escribir en galego sen dificultade".
Tamén remarcou que se debe traballar en fomentar o uso do galego, de forma que "quen queira usalo, póidao facer" e asumir o reto da incorporación da lingua propia ás novas tecnoloxías, o que permitiría conectar con "moitísima xente nova". "Iso é o que ten que facer a Xunta", resolveu.
