A Xunta adxudica 56.000 metros do polígono compostelán da Sionlla a unha empresa de equipamento de interiores e outra de conxelados

A Xunta de Galicia adxudicou 11 parcelas cunha superficie total de máis de 56.000 metros cadrados no parque empresarial da Sionlla, en Santiago de Compostela, tratándose da maior bolsa de chan industrial adxudicada este ano no devandito polígono.

En concreto, 10 destas parcelas foron asignadas en réxime de compravenda a unha empresa do sector de equipamento de interiores xa implantada en Galicia e que prevé ampliar as súas actividades. O prezo destes terreos, que suman case 53.000 metros cadrados, ascendeu a 5,92 millóns de euros.

A outra parcela, destinada a almacén frigorífico e cunha superficie de máis de 3.000 metros cadrados, foi adxudicada en forma de pago aprazado, polo que a adxudicataria disporá de oito anos para o pago do chan adquirido. A empresa compradora está xa implantada no parque e prevé ampliar as súas instalacións.

Na actualidade, na Sionlla están adxudicados máis de 570.000 metros cadrados de chan con bonificacións por importe de 15 millóns, que se suman aos preto de 75 millóns de euros investidos pola Xunta no desenvolvemento do parque, tal como informou o Goberno galego nun comunicado.

Ademais, o Executivo autonómico traballa na ampliación deste polígono, cunha superficie de máis de 400.000 metros cadrados.

A conselleira de Medio Ambiente, Territorio e Vivenda, Ángeles Vázquez, e o alcalde de Santiago, Xosé Sánchez Bugallo, nunha visita ao parque empresarial da Sionlla | Fonte: Conchi Paz