Por E.P. | SANTIAGO DE COMPOSTELA | 29/12/2022 | Actualizada ás 15:21
O alcalde de Santiago e secretario xeral dos socialistas composteláns, Xosé Sánchez Bugallo, sinalou este xoves que hai "unha gran confianza e unha gran apertura" sobre a volta á primeira liña política de José Ramón Gómez Besteiro.
Bugallo fixo fincapé en que, sobre as posicións que poida ocupar no futuro, "é el mesmo quen debe decidir a que quere aspirar" e que para a súa decisión "os demais podemos esperar uns meses".
Así mesmo, referiuse ao proceso xudicial vivido polo que foi secretario xeral dos socialistas galegos e presidente da Deputación de Lugo, e que xa non está imputado na Operación Pulpo.
Sobre isto, o rexedor local indicou que foi un proceso "inxusto e inxustificado" e que "se vía desde o minuto un que moitas das sospeitas que se vertían era absolutamente ridículas e non se sostiñan".
Deste xeito, sinalou que é "lamentable" que Besteiro se vise apartado da política e que "desgraciadamente non é máis que un dos múltiples casos que pasaron, igual que o de Paco Rodríguez", ex alcalde de Ourense que en maio será o candidato do PSOE nesta cidade.
Nesta liña, Bugallo criticou "a impunidade" da xuíza do caso, Pilar de Lara, xa que "non hai ningunha proporción entre a sanción recibida" por ela e "o dano creado".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.