O pasado decembro foi o terceiro máis cálido da serie histórica, cun 60 % máis de precipitacións
Así se reflexa no último informe climatolóxico mensual elaborado por Meteogalicia.
Por Europa Press / Redacción | SANTIAGO DE COMPOSTELA | 04/01/2023 | Actualizada ás 14:22
Galicia rexistrou o terceiro mes de decembro máis cálido da serie histórica e cun 60 % máis de precipitacións que os valores habituais nesta época do ano, segundo o avance do último informe climatolóxico mensual elaborado por Meteogalicia.
En concreto, a precipitación media acumulada no último mes do ano foi de 307 litros por metro cadrado, superando os datos normais dun mes de decembro, que xa habitualmente é o mes máis chuvioso do ano.
En canto á temperatura media, esta foi 2,3 graos centígrados por encima do esperado, tendo en conta os datos das estacións máis representativas durante o período de referencia 1981-2010. De feito, foi o terceiro decembro coa anomalía de temperatura máis alta de toda a serie histórica, só superada por 2015 e 1989.
"O período caracterizouse en xeral pola constante chegada de borrascas atlánticas, coa única excepción da primeira semana do mes. Esta situación explica por que decembro, no seu conxunto, terminou cun balance de choivas moi superior ao esperado, unha tónica que xa se detectou tamén nos anos 2019 e 2020, que rexistraron neste período precipitacións un 68 % e un 67 % por encima do habitual, respectivamente", indicou a Xunta nun comunicado.
A pesar de que decembro foi moi húmido en xeral en Galicia, a provincia de Pontevedra rexistrou valores que superaron os 600 litros por metro cadrado, mentres que a comarca ourensá de Valdeorras contabilizou os rexistros máis moderados, con 73 litros, onde choveu menos do normal.
En xeral, a temperatura media tamén estivo moi por encima do esperado en toda Galicia, debido á persistencia de ventos de compoñente sur que trouxeron aire quente e moitas nubes que impediron que as temperaturas descendesen durante a madrugada.
