Agresións aos traballadores do centro de menores de Ourense por parte dos propios residentes

A CIG denunciou que varios traballadores do centro de menores de Ourense Montealegre sufriron agresións por parte dos residentes que lles manteñen en situación de incapacidade temporal.

Nun comunicado emitido este venres, a central nacionalista acusou á empresa Fundación Diagrama, concesionaria do servizo, de "non adoptar as medidas oportunas" para evitar estas situacións que asocia á falta de persoal.

Deste xeito, demandou á Xunta que adopte as medidas oportunas para reclamar solucións a unha compañía "á que abona centos de miles de euros" para xestionar este centro, cuxo contrato foi renovado antes do pasado verán.

"A Consellería de Política Social ten que velar polo correcto funcionamento do centro e esixir que se poña remedio a estes episodios de agresións para o que é imprescindible dotar ao centro do persoal necesario", engadiu a CIG.

Así mesmo, tamén reclamou que se revise a cualificación deste centro de menores "para adaptalo á realidade, tal como se lle trasladou por parte do Comité de Empresa aos reponsables da consellería nunha entrevista que mantivo fai un par de meses".

Protesta contra o peche de Montealegre, centro de menores nas aforas de Ourense | Fonte: Arquivo