Unha "sociedade corresponsable" e un pacto pola mobilidade sustentable, liñas de traballo de Podemos Galicia para 2023
Borja San Ramón: "A alternativa que queremos construír non se limita ás organizacións políticas, nin ás alianzas entre partidos, senón que a nosa alianza principal debe ser coa xente"
Por Europa Press / Redacción | SANTIAGO DE COMPOSTELA | 05/01/2023 | Actualizada ás 20:01
Unha "sociedade corresponsable" a través dos servizos públicos, un pacto pola mobilidade sustentable e máis vivenda pública son algunhas das liñas de traballo que Podemos Galicia ten programadas para 2023.
Son propostas xurdidas dunha reunión á que asistiron o coordinador nacional de Podemos na Comunidade, Borja San Ramón, o deputado no Congreso Antón Gómez-Reino e a portavoz da organización, Verónica Hermida.
No ámbito dos servizos públicos, co obxectivo de conseguir unha "sociedade corresponsable", a formación morada busca impulsar a sanidade e o sistema de coidados.
A mobilidade será outra liña de traballo prioritaria de Podemos. Por iso, o partido propón un pacto de país do que saia unha mesa entre administracións para a coordinación, a intermodalidade e a vertebración do territorio galego.
Ademais, Podemos reivindica o "dereito a habitar Galicia", cun maior impulso ao traballo e á vivenda. Nesta liña, propón "xestión e autonomía" sobre os recursos, así como unha aposta pola innovación e a transición enerxética.
De feito, San Ramón asegura botar de menos "a existencia dunha estratexia de transición enerxética para Galicia", porque a súa planificación "non se pode deixar exclusivamente en mans privadas".
"A nosa estratexia para 2023 pasa, precisamente, por pór propostas transformadoras na axenda galega tal e como estamos a facer no Goberno do Estado", explica, pola súa banda, Gómez-Reino, quen destaca políticas como os impostos ás grandes fortunas, aos bancos e ás enerxéticas, entre outras, en contraposición coa Xunta.
A maiores, de cara aos comicios de maio, Borja San Ramón sinala ao municipalismo como "clave" neste 2023: "Estou seguro de que daremos a sorpresa e Podemos será a garantía de gobernos de transformación en moitos concellos".
O coordinador do partido morado afirma que este traballo se desenvolverá con diferentes colectivos e axentes sociais. "A alternativa que queremos construír non se limita ás organizacións políticas, nin ás alianzas entre partidos, senón que a nosa alianza principal debe ser coa xente", sentenza.
