Pontón pide celebrar xa o Debate do Estado da Autonomía ante un PP "sen pulso político"

A portavoz nacional do BNG, Ana Pontón, reclamou este luns "con urxencia" ao presidente da Xunta, Alfonso Rueda, que convoque o Debate do Estado da Autonomía porque considera que o Goberno galego non ten "proxecto de futuro" ante a crise inflacionista e a "deterioración dos servizos públicos".

O último debate de política xeral celebrouse en outubro de 2021, aínda con Alberto Núñez Feijóo, porque adoita ter lugar cada ano, salvo naqueles nos que hai eleccións. O Bloque xa o solicitara en setembro de 2022, pero o PPdeG refugouno porque só pasaran catro meses desde a investidura de Rueda.

Nunha rolda de prensa, a líder da oposición galega mencionou como motivos para pedir a convocatoria do debate de política xeral (o último celebrouse en outubro de 2021, aínda con Alberto Núñez Feijóo na Xunta) a situación "sobre todo" na sanidade, na industria e no "precarizado" mercado de traballo. No plano dos servizos públicos, fala dunha Atención Primaria "colapsada".

A isto engadiu Pontón que o sistema de coidados das persoas maiores "non fixo máis que avanzar na privatización; que "non hai medidas eficaces para frear a emigración" da xente nova, unhas 200.000 persoas "nos últimos anos"; e que "continúa o despoboamento do rural".

Xunto a isto, a portavoz nacional do BNG alertou fronte á crise económica e industrial da Comunidade galega. Para iso, botou man de datos: o 6,4 % de inflación acumulada en Galicia ao peche de ano, por encima da media estatal; as pensións e os salarios son máis baixos que a media española; o paro baixou "tres veces menos" e hai hoxe "menos xente traballando que en 2009".

A maiores, citou o índice de produción industrial, "que creceu un 2,2 % no Estado mentres que en Galicia está en caída libre cunha baixada do 5,4 %, á vez que o PIB aumentou un 4,4 % mentres en Galicia limitouse a un 2,5 %".

Xunto a isto, "o fracaso dos fondos Next Generation', xa que "non se impulsou ningún proxecto tractor que supoña un cambio na esctructura económica de Galicia".

A "INCAPACIDADE" DO PP DE RUEDA

Todo iso, para a dirixente nacionalista, é consecuencia da "incapacidade do Partido Popular de defender os intereses" de Galicia "nin ante Madrid, nin ante Bruxelas", nun contexto de crise como o actual.

Ante estas circunstancias, Pontón insistiu nesa "convocatoria inmediata do debate do estado da nación", porque "Galicia necesita un cambio de rumbo urxente" cun PP que está "instalado na rutina, sen pulso político, sen proxecto" e é "insolidario coa maioría social e incapaz de defender os intereses do país".

"O BNG ten alternativas para sacar Galicia adiante", concluíu a portavoz nacional.

O PP DESCARTA A SÚA CELEBRACIÓN PRÓXIMA

Posteriormente, preguntado respecto diso na súa rolda de prensa, o portavoz parlamentario do PPdeG, Pedro Puy, refugou a posibilidade de que se celebre nun horizonte próximo este Debate sobre o Estado da Autonomía porque aínda non hai un ano desde a toma de posesión de Alfonso Rueda, que foi o 14 de maio de 2022.

Puy xustificouno co Regulamento do Parlamento, que no seu artigo 141 bis establece que este debate se convoca "con carácter anual", mentres que non se celebrará "cando no mesmo ano a Cámara investise ao presidente ou presidenta da Xunta de Galicia" (sic).